O le Aso Faraile na te’a nei na tatala aloaia ai e le Iunivesite Aoao o Samoa (NUS) lona nofoaga fou mo le Atina’eina o Tomai Fa’apolofesa ma A’oa’oga Fa’aauau i Oloamanu i Le Papaigalagala Campus.
Na fausia e le Zheng Construction Limited, o le $1.175 miliona sa faatupe e le Malo o Samoa.
Faaalia e le Sui Ao ma le Peresetene o le Iunivesite Tuifuisa’a Patila Malua Amosa, o le poloketi o se faailoga lea o le faaauauina o le tautinoga ma le tuuto e lagolago ai taumafaiga uma e ogatusa ma le vaai ma le manulauti a le Iunivesite.
Na saunoa foi le Minisita o A’oga ma Aganuu, Seu’ula Ioane Tu’au, i lea fa’amoemoe, ma fa’amamafa ai le taua o le Nofoaga Autu i le una’ia o a’oa’oga gafataulimaina ma le atina’eina o nu’u. “E uiga i le fatuina o se avanoa e lagona ai e tagata aʻoaʻo le faʻaosofia ma le musuia e auai i manatu fou,” o lana tala lea.
O le Oloamanu Centre na afua mai i Samoa Polytechnic i le vaitau o le 1990 ma ua alualu i luma i le tele o tausaga, ma ua avea nei ma vaega taua o le misiona a le NUS e lagolago le atinaeina o tomai faapitoa ma le faaauauina o aoaoga i totonu o Samoa.
Na fa’afetaia ta’ita’i uma ole Malo o Samoa mo le fa’aauauina pea o le fa’aagaga mo le lumana’i o tupulaga talavou a Samoa
