6 Ianuari 2025 Samoa: E ova atu ma le 100 afe lita le aofai ole suau’u ua mafai ona pamu ese mai ile vaa suesue a Niusila le HMNZ Manauwanui lea o loo goto ifo ile taele ole gataifale o Tafitoala, talu ona amatalia lea galuega ole aveese o le suauu o loo totoe I totonu o lenei vaa.
O le fuafauaga o loo fai e silia atu loa ma le 200 afe lita le suauu e mafai ona pamu ese ona toe folau ese mai loa lea o lenei vaa suesue ma agai sao mai le uafu I Matautu.
Aua le pamu ina ese mai ole suauu na mafai ona aveese mai e lea vaa suesue mai ile sami ma pamu sao I totonu ole tane suauu o loo ile uafu i Matautu.
Ole aso 5 o Oketopa na mu ma magoto ai lenei vaa I le gataifale o tafitoala ma na mafai ona faasaoina uma mai ai le auvaa, ona ole tali vave atu ole vaega laveai a le fuimu faatasi ai ma le matagaluega o leoleo ae o taulelea o le afioaga na tau ane ai.
O lea galuega tele o loo faatupe ele malo o Niusila atoa ai ma le konekarate na filifilia e faia lea galuega.
O loo faaauau pea a latou galuega ma o loo faaauau ai foi le tapu ona toe solia ma pasia lea vaega ole ogasami e soo se tasi lava ini tafaoga poo ni faagotaga, seia maea lelei lea galuega tele o loo faagasolo.
