O le a afea ai mo le taimi muamua e le meli poo le cruise ship mai Europa le Norwegian Spirits, ia Samoa ile Aso Lulu ole vaiaso nei.
Pei ona faamaonia mai e le tamaitai pule o le Samoa Global Shipping Services, afioga a Muaausa Toleafoa Fiona, e lua aso atoatoa lava lea e maua ai le avanoa o le au fai pisinisi e tapenapena mo lenei foi faamanuiaga I tupe maua.
E le gata o faleoloa, oloa siiatoa, faletalimalo, faleaiga, pa pia, le au fai oloa Samoa, o taavale la’u pasese pei o taxi, ae o le maketi i fua o faatoaga, aemaise o fualaau fai sua ma taumafa mata, ae o fualaau suamalie.
Saunoa Muaausa: “O le lua ai lea o vaa , ua matou aumaia e taunuu faaaoauli mai ma o ese I le pogisa manaia e tele ai le tupe maua.”
O iai le faamoemoe fua I le tala o le tau, o le 11 ile taeao o le Aso Lulu nei, o le a fai ma tala faasolopito i le vaa lea o le Norwegian Spirits, le aso 14 o Tesema 2022, ua pipii ai mo le taimi muamua ile taulaga vaa faalevaomalo o Samoa I Matautu. O le meli lea e sau mai lalo o le kamupani tele a le Norwegian Cruise Liner I Europa.
E 13 fogafale o le vaa o loo Malaga mai ai le tusa o le 1,119 tulisi, ma lona auvaa e 884. O loo folau mai Bora Bora Falani Polenisia, taunuu mai I Samoa ile 11am, ma toe alu ese atu ile 8pm.
O le fautuaga masani lava a le Samoa Global Shipping Services, mo tatou tagata fai oloa faatau, e faaaoga lenei foi avanoa, ia lava oloa, pei o niu, ae o taumafa e masani ona faatau e vaa la’u pasese nei , pei o fualaau suamalie e iai fa’i pula.
Molimauina ile vaa talu ai a le Global Shipping sa tele le mana’omia o oloa taumafa mata ma fualaau, peita’I e le’o mafai ona faamalieina lena manaoga e vaa nei, talu e le lava oloa pei ona taua I luga I le maketi.
Ae o le Malaga mai a le vaa, e eseese uma lava atunuu, o tulisi o loo ti’eti’e mai ai, ua latou filifilia Samoa pei ona saunoa Muaausa: e aofia ai tagatanuu Niusila, Ausetalia, ae ole tele lava o le pasese ole atu Europa, O le Samoa Global Shipping Services I Vaitele, ma le na’o le aumaiga o Meli la’u pasese lana auaunaga, o loo latou aumaia foi faamomoli ma uta mai isi atunuu.
