O loo tumau lava le faatanaga a le malo mo le itumalo o Falealili e faaauau ai pea ona ave ana aumalaga tau apu i atunuu i fafo, “ona ole usitaia o aiaiga ma tulaga uma.”
O se vaega lena o le saunoaga faafetai a le AFioga i le Palemia Fiame Naomi Mataafa i le faaiuga o le vaiaso talu ai, Aso Faraile 19 Aukuso, na sami ai le atoaga o le 15 Tausaga o le POLOKALAME O GALUEGA FA’AVAITAIMI MO FALEALILI.
Na saunoa ai le afioga ile Palemia, Afioga Fiame Naomi Mataafa: “Sa na’o Falealili le afio’aga sa maua avanoa mo galuega
fa’avaitaimi e ‘ese mai aumalaga a Ekalesia ma Fa’alapotopotoga. A’o lenei ua fa’asopolia le tele o nu’u ma afio’aga e autova’a e sa’ili avanoa mo galuega fa’avaitaimi i atunu’u e mamao.
E le gata i lea, a ua molimauina o se polokalame ua mautū le fa’avae ma lelei lona tapenaina. O le pine fa’amau o lo’o maitauina, a’o le’i tu’ua e fanau le afio’aga mo galuega fa’avaitaimi, e muamua ona tapena asiasiga ina ia mautū fa’ato’aga a ‘āiga e tua i ai.
A toe taliu mai i atunu’u mamao pe a mae’a galuega fa’avaitaimi, e lē tu’u aunoaina e le Komiti. E toe sa’ili fo’i po’o fa’aāoga ma le tatau le tamāo’āiga sa maua i lea fuata ma lea fuata. O lenei galuega tulituliloa ma le mata’itūina pea, e atagia ai pulega lelei le fa’afoeina o lenei polokalame ina ia faifaipea lona āoga.
E talitonu, o se fa’ata’ita’iga sili lea mo nisi o afio’aga ma vaega o lo’o tapenaina polokalame mo galuega fa’avaitaimi i atunu’u e mamao. O mea o tutupu ma aliali mai i atunu’u e mamao, e mafua mai i le fa’atuatuana’i i tapenaga lelei.
O lesi molimau o ta’avale fou aemaise ai i le aga’i atu i sisifo ma sasa’e i le tele o atufālega fou. O nisi ia o molimau ola o le polokalame lenei.”
