Ua tatala aloaia le 16 Aso o Faatinoga e tete’e atu ai i sauaga o Tina ma Tamaitai mo le tausaga 2023.
O le aso 25 Novema o tausaga taitasi e amata ai ma faamanatu ai le Aso Faapitoa Fa’a-va-o Malo mo le Tafieseina o Sauaga o Tina ma Tamaitai ma le Aso Faapitoa o Aia Tatau.
O le 16 Aso o Fa’atinoga o se faamoemoe na fauina mai e tagata taitoatasi faapea vaega tumaoti ma o loo unaia i le lalolagi atoa.
O lenei faamoemoe o loo lagolagoina malosi e Malo Aufaatasi, ma o lea foi ua sauni le Malo e faatino lea foi pitolaau taua o le unaia lea o auala e faalauiloa ai pea sauaga o loo tutupu mai.
Ma unai pea faalauiloa ma faatinoga ina ia aoao ai o tatou tagata i auala e mafai ai ona taofia lea amioga mataga ma tafiesea nei uiga mai lo tatou atunuu.
I suesuega sa faatino ile tausaga e 2018, o loo manino ai e tele le faafitauli o loo feagai nei ma Samoa i le Sauaina o Tina ma Tamaitai.
I le itu o tamaiti e tusa ma le 87% e aafia i sauaga i totonu o aiga, 86% e aafia i sauaga o le kiki, tu’i ma isi sauaga.
E 9.5% o tamaitai e ripoti mai sa faamalosi e le tagata lava o lona aiga.
Mo tagata matutua, 86% o tina ma tamaitai nofotane sa aafia i sauaga pei ole kiki, tu’i ma le faaaogaina o mea malo e fa’aoo ai sauaga; 87% o tina ma tamaiti sa aafia i lea suesuega e sauaina e ala ile ee ma le faaaogaina o upu malolosi; 24% o tina ma tamaitai sa sauaina e ala ile titinaina ole ua, 87% o tamaitai sa faaoo ai le fa’afefe ma sauaina ile tino.
O nisi o vaega ole a faatinoina ile 16 Aso e aofia ai aoaoga, faalauiloa, tusiina o tala fatu faatauvaga, o le unaia ole faataua ma le faalauiloa o tina ma tamaitai o loo sauaina ae iai ma’i tumau o le tino ma le mafaufau.
O nei faatinoga uma ile16 Aso e agai lava ile Tete’e atu i sauaga o Tina ma Tamaitai.
E faailoa atu lava e le matagaluega vaega e faatinoina i aso taitasi o le polokalame.
