O le saunoaga a le Sui Komesina o le Matagaluega o Leoleo ma Falepuipui, Afioga a Leiataualesa Samuelu Afamasaga ile Letio Polensia, ole solaaga a pagota ile masina talu ai, e lei taunuu, o se itu lea e tilotilo iai le Matagaluega, e toe fai se faiga i le falepuipui o iai nei.
I le mana’omia ai lea ona fai oni sela e tuu ai pagota nai lo poloka o loo iai nei.
E 12 alii pagota ua molia ai nei ile taupulepule e soli le tulafono, umia o aupega mata’utia, ma le taumafai e sosola.
50 pagota na taumafai ae lei manuia.
Peita’i ua faaaoga ai le falepuipui i Oloamanau i Mulifanua mo pagota amio lelei, faapena foi i Vaiaata i Savaii. O falepuipui na o loo galueaina mai ai maumaga ma faatoaga o fualaau aina, aua le tausiga o alii ma tamaitai o tuli faasalaga ma le vae taofia e talia a latou mataupu.
Ua amata ai foi ona faaititia le aofai o pagota i totonu o poloka poo fale uumi, ile va o le 42 ile 47.
O le faiga lea i fale uumi o loo tuu ai pagota i Tanumalala, e faaauau ai ona nofo tasi pei ose aiga poo se nuu ma faifaimea pei se aiga, e iai lo latou faamatua poo le faatama mai lea poloka ma lea poloka.
Taimi ole tatou faatalanoaga, e oo atu i le 50 pagota i le poloka, ma ni leoleo e tiute ai ile faitotoa.
Ae faigofie lava ona osofa’ia na leoleo pe a oo ina tupu le faaletonu pei ona molimauina ile masina talu ai, ina ua taumafai se vaega e sosola i tua.
O le 2019 na tatala aloaia ai le lotoa i Tanumalala.
