O le’a faaauau lava ona le toe iai ni laina uumi ma le toe usuusu po le aufaisaofaga i ofisa ole NPF mo le talaina o latou faamanuiaga faaletausaga.
Pei o le 2 pasene lea o loo totoe ole faamanuiaga na tala auaua’i mai a le au faisaofaga i le tausaga lenei 2022 . O le’a amata ona maua le lua pasene oloo totoe mai le NPF ile aso 1 o Tesema le masina fou, e gata i le aso 23 Tesema.
I le pepa o faamatalaga a le NPF lea o loo ta’u mai ai e le toe maua lenei faamanuiaga i soo se lala poo se ofisa o le NPF vagana ai fesoota’iga televave.
Peita’i o tagata ua galo a latou pass word e mafai ona ui ane ise ofisa latalata ole NPF mo se fesoasoani.
O le lua pasene a le au fai saofaga lea o le’a faauma atu i le masina fou, ose vaega lena na totoe mai ole FAAMANUIAGA FAAPITOA – IUPELI AURO $42.35 miliona tala.
Pei ona faalauiloa ia i luga fesootaiga televave a le NPF:
E tusa ai ma le vaega 36 ma le 39 o le Tulafono 1972 a le Faaputugatupe mo le Lumanai Manuia o Tagata, sa faamaonia ai e le Komiti Faatonu ma le Pulega le totogiina atu o faamanuiaga faapitoa e tusa lona tau aofai ma le $42.35 miliona tala aua le faamanatuina o le Iupeli Auro a le faalapotopotoga.
O na faamanuiaga sa faatulagaina faapea:
- Totogi tupe atu o le 5% faapitoa mo sui fai saofaga uma o le NPF i totonu o le tausaga 2022 i lona tau aofai e $41.64 miliona tala.
- O aiaiga nei o lenei faamanuiaga: • 3% sa mafai ona totogiina sa faaaoga ai le upega tafailaga e amata atu i le Aso Lua 12 Aperila 2022.
- 2% o le a mafai ona totogiina atu ia Tesema 2022.
Ole vaega mulimuli lea e 2% o le’a amata tali e le au faisaofaga pei ona taua i luga.
