Ole amataga ole vaiaso nei lea na feiloai atu ai le au siisii ole atunuu ma pulega atoa lava ile pule ole faletupe ole National Bank of Samoa e ala lea ise foai tupe ua faameaalofaina atu e le faletupe ma le latou pulega aua tapenapenaga mo le isi a latou malaga mo taaloga ole Commowealth Junior lea e faatautaia i Fiti.
I lenei feiloaiga na momoli ai e le pule ole faletupe a le NBS le afioga ia Papalii Sam Swan ke agaga faamalo ma le onosai ile au siisii u’amea mamafa a le atunuu lea na fai ma sui e tauva ai ile Olympic lea na faia i Pale Farani.
E ui e lei manuia a latou taumafaiga, ae e leo tuua ai pea le tuu atu ole tauau fesoasoani ma le lagolago a le faletupe mo tagatanuu o Samoa poo le NBS e lagolago ai ia tapenapenaga uma a le au mo le isi foi a latou tauvaga lea e fuafua e malaga ai mo Fiti.
E $20 afe tala le meaalofa a le afioga ile pule sili ma le faletupe atoa ona tauaaoina atu mo le faiaoga ole au siisii u’amea mamafa a le atunuu.
Na faailoa e le afioga ia Tuaopepe Jerry Wallwork e 9 alo ma fanau ole au siisii lea ua mae’a ona piki e malaga i Fiti mo lenei ta’amilosaga olea faagasolo e toa 3 tama’ita’i ma le toa 6 o alii o i latou uma nei lea sa filifilia mai, ao faagasolo ai le tauvaga siisii i Pale Farani.
O tama’ita’i ia ua tofia e malaga atu i Fiti mo lenei faamoemoe olea faagasolo lea e iai le tama’ita’i o Seine Stowers, Avatu Opeloge, Lesina Fiapule.
O alii lea ua filifilia mo lenei tauvaga lea e iai le alii o Nevu Ioane, John Tafi, Jack Opeloge, Don Opeloge, Maeu Nanai Livi faapea ai lea ma le alii ia Sanele Mao.
Ole agaga faafetai lea na momoli e le afioga ia Tuaopepe Jerry Wallwork ile afioga ile alii pule ma le pulega atoa ile tuuina mai pea ole latou tauau e fesoasoani ai mo tapenaga a alo ma fanaua nei olea malaga, ma ole agaga faagaeetia ma le faafetai ona ole taupati mai pea e ui e lei taulau ai ole faamoemoe na malaga atu ai i Farani ae ole agaga faafetai lava ia e leo taofia ai pea lo outou alolofa ma le fesoasoani mai ai i tapenaga lea olea latou alo atu iai.
Ile faaiuga olea faamoemoe na tauaaoina atu ai foi e le faiaoga ole au siisii u’amea mamafa ma le au atoa se trophy faatasi ai ma le toniga taalo a le ausiisii e fai lea ma meaalofa ole agaga faafetai mo le fesoasoani a le faletupe ole National Bank of Samoa.
