E le’o faaititia le faatama’ia a puaa aivao i le togavao o Falealili, aemaise ai i gauta o Poutasi.
O le aso Toona’i 2 Novema, na tatou asia ai le talaloa mamao ile tuasivi o le afioaga lea o Poutasi.
O iina o loo taoto ai le faatoaga o talo, ufi, taamu, niu, ‘ava, ma fualaau aina a le afioga a Tumanuvao Pa’ia’aua Pualele Fui.
E taunuu atu le tatou asiasiga ile faatoaga lea, ua taatia foi le lafo, e ofi ai le 6,000 tiapula.
Peita’i ua amata ona tai ono, tai tolu, ma le ono lautalo o isi toaga fou, e ese mai toaga ua amata ona fafai.
Ae o le fili numera tasi lea o loo feagai ai nei ma le faifaatoaga lea mai Falealili, o le puaa aivao.
Saunoa Tumanuvao o le pulenuu foi lea o le afioaga o Poutasi, “Afai e 100,000 le tiapula, o lana ia fuafua, o le 30afe e ai e puaa, 20afe e pepe ae na’o se 50afe e fafai ma selesele ile uma ane ose na to’aga tele.
“Ae pau lava le togafiti o loo faia ile taimi nei, ole la’u o ta’ifau i le talaloa, nofo ai ma le tagata, e vaaia.
O le gaoia o le ma’umaga, e fai lava si mamao tele i uta o le talaloa , mo se tagata gaoi, toe leaga le auala, e na’o taavale malolosi lava e mafai ona o ile auala.
Peita’i ua amata ona ta’u le faiga ole auala galue o le latou nuu, mai le latou tupe o le miliona tala.
O se laasaga lelei tele lena mo atina’e ma’umaga ile talaloa mamao lea e galue ai nei.
Peita’i o le faatamaia o ma’umaga e puaa aivao ile taimi nei, o loo faatalitali foi latou ile taimi e oo atu ai le mailei neti ile latou nuu.
Aua o loo auaua’i lava faasologa o nuu e tatao ai le mailei neti a le ofisa o Faatoaga.
