Ole tausaga e 1970 ile masina o Aokuso ma ole valu foi lena o tausaga talu ona tutoatasi Samoa mai Pulega Faakolone o malo tetele e tolu lea na pulea Samoa, ma ole vaitausaga foi lea na auai atu ai Samoa mo ulua’i taimi i fono ole Taupulega.
Ma ole 54 tausaga o avea Samoa ma sui malo ole taupulega.
O Samoa lea e atoa iai le 56 o atunuu oloo iai nei i lea Faalapotopotoga e aofia ai ma malo mai atu Aferika, Asia, Keripeane, Europa atoa ai ma le Pasefika.
Ose tala faasolopito ile lalolagi le mafai lea ona talimalo se taimi muamua atunuu itiiti ole Pasefika i lenei fonotaga talu ona amatalia lenei fonotaga faavaomalo ma o Samoa lea ua amata tatala malae iai.
Ile saunoaga a le afioga ile Palemia ia Fiame Naomi Mataafa, na ia faailoa ai, oloo faagasolo pea tapenaga a Samoa mo le talimalo ai i lenei fonotaga tele a Ta’ita’i o malo ole taupulega olea usuia ile Aso 21 – 26 Oketopa 2024.
O nisi nei o mataupu oloo taula’i ai le soalaupulega a Ta’ita’i ole taupulega i lenei fonotaga tele faavaomalo e pei ona faailoa ai ele afioga ile tama’ita’i Palemia e faapea,
” I nei mau tausaga, oloo tumau pea le unaia e le li’o o malo ole taupulega e aofia ai ma Samoa, mataupu tau ile atina’e, pulega faatemokalasi, faatauaina ole aiatatau, matimatiina o mataupu tau ile saolotoga, ole filemu ma vaega ogaoga ua aafia ai atunuu e pei o suiga ole tau.
” Ile talimalo ai o Samoa ile fonotaga i lenei tausaga, ua filifilia ai le Autu ‘ ONE RESILIENT COMMON FUTURE: Transforming our Common Wealth.” Oloo faatauaina le tasi ole faamoemoe mo se lumanai e gafatia ma faaauauina e ui ile tele o faafitauli ile vaavaai lea ini auala e aupito sili ona lelei e iloilo ai le fetala’i ma le toe fuafuaina fa’aiuga mai le tofu sao uma ai ole toatele o tagata.
” Ole faamamafaina ole ola gafatia ma le faaauauina, ose auala lea e aofa’i uma iai tulaga e maua ai le maopoopoga o aiatatau a tagata, ole fesoasoani i auala e manaomia ai e nisi tagata le fia maua ose fesoasoani, ole to’a filemu. Tatou te talitonu ile saili fofo i totonu lava o lo tatou atunuu.
” Tatou te faatauaina o faigatonu faifaatasi poo le unaia oni tulaga ua ave iai le faataua faaitulagi. E taua tele ia manatu ile tatou itulagi ole Pasefika ona ole aupito aafia o tatou fesuiaiga ole tau aemaise ai ole faaaogaina ole ogasami ole Pasefika oloo tatou nonofo ai i le lalolagi, e aunoa ma le vaavaai mo si o tatou atunuu, e fai sao ai i mataupu tupito o lenei fonotele atoa ai ma tonu fai olea soalaupuleina.”
E silia ma le 149 auaunaga faasalalau ua lesitala mo faasalalauga mo le fono a ulu o malo ole taupulega (CHOGM) oloo talimalo Samoa ile masina fou mai le Aso 21 seia oo ile Aso 26 o Oketopa.
Ole saunoaga autu a le tama’ita’i Palemia o Samoa afioga Fiame Naomi Mataafa.
