E 56 atunuu o le lalolagi o lea autovaa mai i le fonotaga tele lona 27 a Malo ole Taupulega, lea e faia mai i Samoa ile aso 24 o Oketopa 2024, e 56 foi nuu ma afioaga o Savaii ma Upolu, o lea filifilia e le Pulega o turisi e tufatufa iai atunuu na e 56 ma fai le tauvaga teuteuga ‘a’ai.
Na faamaonia mai lea tapenega e le susuga ia Fanaea Natu o le sui sinia o le ofisa o Turisi i le leitio Polenisia
O le masina fou o Mati, o lea faasolo ai asiasiga a le Pulega o turisi i totonu o afioaga na e 56 ma asia a latou tapenaga ao lei oo i lea faamoemoe tele.
Ae faatoa fai mulimuli ai le laugatogi i le masina o Aukuso.
O le taimi nei toeititi lava maea le faapipiiiina o faailoilo o igoa o afioaga taitasi i Upolu ona see lea i le motu o Savaii, ae faaiu mai ia Apolima ma Manono, o na faailoilo sa tapenaina e le malo o Niusila mo le faa aulelei atili pea o nuu ma afioaga.
Peitai ua tuuina mai e le Pulega o turisi le fautuaga i le mamalu o le pulega alii ma faipule ina ia mataitu tupulaga talavou o afioaga o loo faleagaina nei mea totino taugata.
Ina ua maitauina i Upega tafailagi tupulaga o le afioaga o Lotopa na feosofi ma saofafai i luga o lenei faailoilo ma pueina ai ata, e aunoa ma se faatanaga.
O le fautuaga a le Pulega o Turisi ina ia faatumauina ai pea le aulelei ma le matagofie o Samoa aua le silasila ma le asiasi mai foi o turisi mai isi atunuu, aemaise o le taligamalo tele o le alo atu iai.
