E $1.8 miliona le tupe ua tauaao atu nei e le Malo o Ausetalia mo le Pulega o tagata maimoa mai fafo, e fesoasoani atili lea i le faaleleia o vaega tau maketi e faatosina mai ai turisi i Samoa.
Na sainia lea tupe e le taitaifono o le Pulega o turisi le susuga ia Tauiliili Alise Stunnenberg, ma le Ofisa Sili le afioga ia Toleafoa Pativaine Petaia-Tevita ao molimauina e le Komesina o Ausetalia le susuga Will Robinson ma lana ofisa.
O le agaga o le fiafia ma le faafetai o le Pulega o turisi ona o le alofa tulai o le malo o Ausetalia ua foai ai lenei seleni mo le fesoasoani atili i tuamafaiga a le Pulega o turisi.
Ma ua matuai faamausali ai le faiga paaga e le gata o malo e lua ae o le Pulega o tursi ma le Malo o Ausetali e ala i le vaa vaa lua e fausia sootagata tau atinaega o auala e faatosina atili mai ai le turisi i Samoa ma fesoasoani i le siitia o le tamaoaiga o Samoa.
