E 11 Ofisa Sili o Faalapotopotoga a le malo ua mae’a faatauto

SHARE NOW

E sefulu ma le tasi ofisa sili o faalapotopotoga a le malo na faatautoina i le taeao o le Aso Gafua, le amataga o le vaiaso nei.

Na faia i le potu fono tele a le Tui-Atua Tupua Tamasese Efi building i Sogi ile itula e 10 ile taeao. O sui sa faatautoina e iai le ofisa sili mo le Matagaluega o A’oga Taaloga & Aganuu, Aeau Chris Hazelman.

O le ofisa sili mo le faalapotopotoga a le Scientific Research Organisation of Samoa poo le SROS, lea ua tofia ma faatautoina ai le afioga ia Fiso Dr. Fiame Leo.

I le faalapotopotoga o tagata faigaluega a le malo lea sa faatautoina ai Kolone Tikeri e fai ma ofisa sili ma failautsi.

O le afioga ia Fonoti Talaitupu Li’a Taefu na faatauto e avea ma ofisa sili o le Matagaluega o tiute ma tupe maua a le malo. Lemalu Selesitina Puleaga Meni-Reti ua faatautoina e fai ma pule sili o le SNPF, Mua’autau Silipa e tauavea le tofiga ofisa sili o le Fale Tupe mo Atinae o Samoa, Tafesilafa’i Ipiniu Filipo e tautua o se pule sili o le Pulega o Vaa a Samoa.

Sautiamaivasa Titimaea Tiotio e auauna o se ofisa sili mo le Faalapotopotoga o Samoa, Tuiafelolo Alexander John Stanley ua faatautoina e fai ma Komesina o le Ofisa o Faigapalota a le atunuu, Tuitoga Christina Angela Te’o Faitele e tautua ile faalapotopotoga o Tausi Mavaega a Samoa ma le afioga ia Tuifuisa’a Patila Amosa e fai ma pule sili o le Iunivesite Aoao o Samoa.

Saunoa le Palemia, Fiame Naomi Mata’afa i sana upu faamalosiau sa momoli i sui e sefulu ma le tasi sa faatauto i le asō. Ia aua lava nei avea ni faafitauli o galulega e gape pe gase ai le faatinoina o le latou tautua.

Na ia fautuaina foi sui ‘ia tautuana ma i latou tofiga ua tofia ai latou e tautua ai. Ia faia ma le faamaoni, tautua ma le ma’elega ma ia alolofa ile atunuu.

O se upu sii mai le tusi pa’ia sa fai ma matua o lenei faamoemoe.

Na maua mai lea ile tusi a Kolose 3:17 “O mea uma foi tou te faia, i le tautalatala po o le amio, ia faia uma lava ia mea i le suafa o le Alii o Iesu ma le faafetai i le Atua le Tama e ala ia te ia.”