E 838 fanau o loo aotauina ile Iunivesite Aoao o Samoa o lea le toe mafai ona faaogaina le itulau e maua ai lesona o aso taitasi( moodle) amata atu lea i le asō, faaleaogaina le resitala ma aveese igoa mai le lisi o tama ma teine o loo aooga ile Iunivesite pe a maea lava le vaiaso nei e lei oo atu se matua e saini se maliega mo le totogiina o se vaega o piliaoga.
I le faasilasilaga faalauaitele mai le itulau a le Iunivesite Aoao o Samoa, o loo faamanino mai ai le toa 838 nei o fanau e lei totogiina lava se vaega o a latou piliaoga o le semesa muamua ua maea.
E ui sa tuu iai le avanoa poo le toe tuu lea i fua o le aso e faagata ai piliaoga ae o le faapafala lea o le sala tupe faaopopo pea tuai ona totogi atu piliaoga.
Peitai ua iai le faaiuga a le Pulega o le Iunivesite Aoao o lea aveesea loa fanau nei r toa 838 mai luga o le itulau poo le initaneti o loo faaogaina e fanau aoga mo meaaoga e amata atu lea i le asō.
Pe afai lea e oo atu lava i le Aso Faraile le faaiuga o le vaiaso nei e lei oo atu lava se matua e saini se maliega e togitogi ai se vaega o le pili.
Ae a oo atu lava i le vaiaso fou e lei sainia lava se maliega o lea faaleaogaina loa o latou resitala ma aveese o latou igoa mai le lisi o tama ma teine o loo aotauina i le Iunivesite.
O le toatele o fanau aoga ua maea totogi pili poo se vaega foi o latou piliaoga sa faatagisia lea e o latou matua mai Fonofaavae e pei ona fasafua ai se vaega o le poloketi miliona a le malo o loo faasolo nei.
