Ua faamauina le toatele o i latou na ao’oga, ‘iu manuia ma a’oa’oina mai tomai o taleni eseese e le gata o le faagatama o le lakapi e pei ona iloga ai le au lakapi 15 o le Kolisi o Avele i le na vaitaimi ae o le siisii ‘uamea mamafa, i le afioga a Seiuli Paul Wallwork ua faamanavaina e le Atua ana galuega i le aso Tofi o le vaiaso nei.
Peitai o le fiafiaaga o loo iai lava nisi o ona alo o loo tumalosi lava e una’ia le taleni o le siisii i totonu o Samoa e pei ona lauiloa ai le atunuu, le susuga ia Tuaopepe Jerry Wallwork o loo tulai mai le foe o le faiaoga ulu o le Asosi siisii a Samoa.
I tala faasolopito o lenei foi tamalii o le atunuu, e iloga foi i le faaagatama o le lakapi, e pei ona faamauina ai le tumatie o le au lakapi a alii le ‘iavai mai Tanugamanono ao avea Seiuli ma uluaoga o le Kolisi o Avele.
O le afioga ia Seiuli o loo mafuta ma le faletua ia Su’a Julia Wallwork o loo faafoeina le ADRA Samoa, o tua’a na o le susuga ia Tuaopepe Jerry Wallwork o le faiaoga ulu o le Asosi Siisii uamea mamafa a Samoa, ma le tamaitai loia sili a Samoa le susuga ia Su’a Hellen Wallwork-Lamb.
E avatu ai ma faamaisega ma faamafanafanaga i le faletua ma le nofoaalo ona o le valaau pa’ia a le Atua i le tama o le aiga.
