8 Ianuari 2025, Samoa: O le Ekalesia ole au paia o aso e Gata o le isi lea pa’aga fesoasoani a le Matagaluega o le Soifua maloloina o lo’o ofo fuaina mai a latou meaalofa aua le faaleleia atili ai ole faatinoina ole auaunaga a le Falemai o loo I Motootua.
E o’o atu ile 90 moega mo gasegase ua faameaalofa mai e lenei Ekalesia mo le Matagaluega o le Soifua Maloloina, mo auaunaga i Falemai i Upolu ae fa’apea ai auaunaga o loo i Savai’i.
E mo le nofo silafia ai e le mamalu ole atunuu e le’o se taimi muamua lenei ua agalelei mai ai le Ekalesia Paia i le Matagaluega, na foai mai foi nofoa faataavalevale poo wheelchairs, o totoga e fausia ai aao fa’apipi’i, ma isi mea taua ma le aoga, aua le faaleleia ma le faafaigofieina o feoaiga a le mamalu o le atunuu e iai a’afiaga tumau o le soifua.
Na momoli le agaga faafetai a le afioga i le Minisita o le Matagaluega, le faatonusili, le pulega ma le matagaluega ato, mo lenei fesoasoani taua tele ma le aoga, lea ua foai ma agalelei mai ai le Ekalesia o le Au Paia o Aso e Gata Ai.
