Ua faamauina le pa’u o tupe maua a le faalapotopotoga o fanua a le malo, Samoa Land Corporation i lana tala faaletupe ole piliota o lipotia.
E 2.5 pasene ua faaititia ai ana tupe maua i le piliota faamauina, talu fesoaosani o loo tuuina atu mo ana paaga, i le taimi ole faamai tele koviti19 , lea na tapunia ai le tatou atunu’u, ma le mafai ai e tagata ona fai a latou peimeni .
Tusa o le 74 pasene o tupe maua ale SLC, e sau mai ana fanua lisi, ma lesi 20 pasene e maua mai maketi, Savalalo, Vaitele ma Salelologa, ole Malae ta Polo, Faleata golf course, ole faletalimalo i Malifa Lodge ma isi .
Peita’i o loo molimauina foi le siitia o ana tupe faaalu mai le $7.7 miliona, ile $8.4miliona mo le taimi lava lea poo le piliota faamauina.
O le faateleina o ana tupe faaalu ona o le faiga o le auala fou i ana fanua lisi, ma le siitia o aiga i Sogi i Falelauniu, ma isi vaega tupe faaaoga se ia oo mai ile taimi o aafiaga o le koviti.
O loo atagia foi i faamaumauga, ole piliota lava lea, o le 50 pasene o tupe alu a le SLC, o le faagaioina ole ofisa ma le faatinoga o galeuga a le faalapotopotoga.
Peita’i toe lua vaiaso o le faasalalauga faalauatele mo le sailia ose Ofisa Sili, CEO a le SLC, ina lata ai foi ina uma le konekarate tolu tausaga a le Pule o iai nei, le tofa a Ulugia Petelo Tavesi.
Ole SLC lea o loo gafa ma le vaaia ole silia i le 24 afe eka o fanua ole malo i vaega ole atunuu.
O le SLC foi e vaaia le maketi i Vaitele, Salelologa ma le flea Maketi i SAvalalo.
Ae o le avanoa o le Pule sili poo le CEO, ua faasaalau faalauaitele ai nei, mo tagata agavaa e faaulu a latou talosaga, ile konekarate tolu tausaga.
I lalo o le pulega a le tofa a Ulugia, ole SLC sa faamauina le iai o tupe faasili, poo polofiti a le SLC, se ia oo mai ile taimi ua aafia le tamaoaiga, ile misela ma sosoo mai ai lava ma le faamaitele , le Koviti 19.
O lana lipoti talu ai nei, mo le tauasga faaletupe e 2020, na faamauina ai le pa’u o lana polofiti, ile $3.4 miliona. Tusa ma le 14 pasene ua faaititia ai faatusa i le $4miliona ile tausaga i luma atu, pei ona faamauina i lana lipoti faaletausaga.
