Ae mo le poloketi miliona tala tulituliloa a itumalo e 51 ile atunuu, ua saunoa le Minisita o Tupe, Lautimuia Uelese Vaai, ole tuai lava ona avatu le lisi ole faamaoniga mai le Komiti faafoe a le Matagaluega o Tina ma Tamaitai,
Ae ole tupe ia ua mae’a ai foi ona taatia ese le $51 miliona ole tausaga faaletupe ua savalia nei.
“O le komiti Faatonu ole miliona tala, ile Matagaluega o Tina ma Tamaitai, latou te faamaonia lipoti mai komiti faaitumalo , ma faamatuu atu loa le miliona a lea itumalo ma lea itumalo.
Ose faamanuiaga ua pepese ai aiga ma itumalo ua tofu, uilipaelo, moa vao, fagavao, pa uaea, suo, oso , ae ua tatalo, e talosia ae oo atu i lesi tausaga ua mafai e le miliona ona faalelei maota nofo o isi aiga lima vaivai i nuu i tua, e le gata ina o loo nonofo pea i faleoo, ae o le leai ose vai paipa e oo iai.
O molimauina o loo iai tane vai, ae seiloga foi e timu, faatoa maua se vai, ae ole miti lena mo le agaiga ole miliona tala, pei ona saunoa le tama tausi aiga ia Falefata Nari o Gagaifomauga Savaii, ia oo atu ise laasaga e faaleleia ai fale nofo o aiga ma se fesoasoani ile suavai.
O mea faigaluega o loo la’u atu, e mo le faaauau ai ona maua ma lava taumafa. Ae tumau lava le faaletonu o le siosiomaga o soifua ai tagata e le gata o nuu tu taulaga ae ole tele o afioaga i nuu i tua.
