O loo malotia ai Samoa ile malaga taualoa a le Kovana Sili o le Malo o Ausetalia le afioga ia David Hurley ma lona faletua ia Linda Hurley.
Ma amatalia ai loa le asiasiga i nisi o faalapotopotoga o loo fesoasoani mai ai le Malo o Ausetalia e tauala mai ile la faiga paaga ma Samoa, ma o le auga foi lea o le malaga mai o lana afioga mamalu.
O le aso ananafi lea na maua ai ile fonotaga a le Palemene o le aoauli le le auai ai o le tamaitai Palemia le afioga ia Fiame Naomi Mataafa ma nisi o Minisita o le Kapeneta ma le taitai o le Itu agai ina ua auai atu ma feiloai ma le Kovana sili,
Na faailoa mai foi e le polokalame o lea asiasiga olea feiloai atu ai le Kovana ile Ao mamalu o le Malo le afioga ia Tuimalealiifano Vaaletoa Sualauvi II ma le masiofo.
I le maea ane o le na feiloaiga na asia ai loa le Faalapotopotoga o Aiga Fuafuaina i Matootua ma maitauina ai le maualuga o le tulaga ua iai foi le auauanga a lea faalapotopotoga.
O lea talimalo ai foi le Ekalesia Faalapotopotoga Kerisiano Samoa i Matautu Falelatai i le Kovana mo tapuaiga o le Sapati o lea sau, ma faaafe faaloalo ai e le Ao mamalu o le Malo mo le taligasua o le Aso Sa.
E tolu aso o le faamoemoe o le Kovana ma lona faletua e toe tali atu ai le faigamalaga ile aso Gafua o le vaiaso fou ma asia ai foi nisi o atunuu tuaoi o le Pasefika pei o Vanuatu, Tonga, Tuvalu ma Kiripati.
Na momoli aloaia e le afioga ile tamaitai Palemia le faafetai ile Kovana ile manatu mai ia Samoa ma le asiasi mai o foliga vaaia ia o le faamausali atili ai pea o faiga paaga a malo e lua.
