E anoanoai taumafa eseese ma le tinoitupe e $5,000 na foai e le Pulega o Vaa a Samoa, mo le maota o tama ma tina matutua i le Mapuifagalele i Vailele i le aso Faraile ua mavae.
O se faamoemoe ua leva ona tapena iai le Ofisa sili le afioga ia Sooalo Kuresa Sooalo ma le aufaigaluega.
O le isi lea o masani a le Pulega o vaa i tausaga taitasi, o le faailoa lea o lo latou alolofa i tina ma tama matutua ua nofoia lea foi nofoaga.
E na o le agaga faafetai na faaleo e tamaitai sa o loo feagai ma le tausiga o tina ma tama matutua i le aso na oo atu ai le Pulega ma le latou fesoasoani.
I le pepa o faamatala na saunoa ai le afioga ia Sooalo, e faafetaia tamaitai Sa i le latou galuega fita, o loo manuia uma ai ma soifua maloloina o latou matua.
Ae o le meaalofa ua foai o le auala lea ua faaali atu ai le lagolago ma le tautua faifai pea a le Pulega e le gata mo le atunuu ae o moi latou ua pulapula lagoto le soifua.
