E le’i iai se silafia o le Fofoga ole Maota, Papalii Taeai Masipa’u, ile mataupu lea na faailoa e le Minsitia o faataoaga ma faigafaiva, Laaulialemalietoa Polataivao Leuatea Polataivao fossie Schmidt.
I le mafuaaga o le le lagoana pe vaaia ai o le faipule filifilia o le itumalo o Vaimauga 3 ile palemene I lenei vaiaso.
Ma tuu ai le avanoa ile afioga ile Minsita ia Laauli.
“Sa iai a se mataupu lau afioga e leo nofo filemu ai le agaga ma le loto, fiafia fai ae a le faafetai ona o taualumaga o le tatou fono, ua ese lenei vaitau lau afioga i le Fofoga Fetalai ona o lau faatofalaiga,
“Ae talu mai lava ona filifili le taitai o le itu agai ma le na itu ua sui lagona, sui foi manatu ona o le mafanafana o le tatou fesootaiga vavalalata ma e momoli atu ai le agaga o le faafetai tele,
“Lea ua saunoa le afioga i le sui Palemia e iai a si mea laititi lea lau afioga te le manao oute alu ae lei fai atua,
‘Ua tatou le faatasi nei ma le sui o le Vaimauga 3, ua tuua lona nofoa ona o se mataupu tuga ua toe tulai mai foi, lau afIoga ile fofoga fetalai ua ou manatu e tatau pea ona faaleo i totonu o le maota ona ua liua lota fiafia e avea ma faanoanoa,
“Ona o lea ua toe agina ananafi, ia ua toe fa’i foi lona sa, e lei fai lana lauga faataupou e lei saunoa foi le maota ao lea faatoa uma ona fai lana faatautoga lau afioga,
“O le ala o lo’u tulai lau afioga ile fofoga fetalai, ia o na iina le tofa na ona matou faaoloolo ma’au, nei lava matou te oloolo pito vaa ma o matou taumafai atu e fusi le fau o malo,
“O a foi tatou feupuaiga ma tala i luga o upega o faamatalaga, lea lava e tapua’i Olo olea foi oute tapuai tulaga tau faamasinoga ona e iai a le taimi o le Atua, aepeitai ane o le maitau paga lea, talofae,
“O la ua toe ausulusulu i loa e toe talitali atu le matupu o lena itu o le maota, Falevaimauga, Tuisamau, o Fusi ma fanua tanu e tau ii Sinave ma Ulumatootua Falevaimauga o le Aiga,
“Foata te le tau faiatu lea aiga lea tatou fai ai upu, a uma le palota o ai e tulai mai o le na, ao lea le mea lea ua toe fai?. Ia e le aoa’ia e laupua tama faiga, na ona matou pipii ama ma o matou faaoloolo ma’au ina nei pule mai tua aiga ao lea toute afifio mai ma tatou faafesagai taimi uma ma aso uma,
“L e tuaoi o le Faleanoamaa ma le Falevaimauga ma Faleata, e tausia le atunuu, lau afioga ile fofoga fetalai ua ou manatu oute le tulai gugu le mataupu lea, talofae ile Falevaimauga 3, e lei gagana ao lea ua velo lesi tao,
“Avatu ai pea la’u faamalosi au, uso tatou tapena, o le savali a le Faatuatua i le Atua Samoa ua Tasi, lototele ma tatou faatuatua i le Atua, o le agaga lena leaga o lea tapuai Samoa ma le tatou palemene, aemaise foi le tapuaiga faafeagaiga taulagi se tatou tausi ia le filemu,
“Sunu’i ala o taua ae tatou ave le faamuauma i le atua, fesoasoani mai le uso ia o le agaga lea ma le faaaloalo lau afioga, faafetai mo lo’u avanoa.
