E faailoga tagata le tulafono lea na faapitoa i le Matagaluega o Leoleo pei ona tali mai ai le afioga i le Komesina o le Matagaluega Auapaa Logoitino Filipo ina ua fesiligia e le Leitio Polenisia, faatatau ile faasa ona faigaluega faatasi ni ulugalii leoleo.
Ma ua taga’i ai nei le Matagaluega e aveese lena tulafono. Ose faailoga fesili ile Komesina lea faaiuga, ile aisea e le mafai ai ona faigaluega faatasi ulugalii leoleo faaipoipo, ae mafai e fanau, o loo fesiligia ai foi le amiotonu o lena faatatau.
Ile maitau a le Komesina, sa tele lava matupu na tupuga mai ai i le tulafono lena mai le taimi o le Palemia talu ai, Tuilaepa Sailele Malielegaoi.
Ole 2017 a’o avea ai le Palemia o lena taimi ma Minisita o le Matagaluega o Leoleo, na avane ai le faatonuga, e faatatau ile faamavae o lesi tagata o le ulugalii faaipoipo, ma faamave le matua o leoleo sona atalii poo sona afafine
Talu sa iai popolega i faafitauli ile faatinoga galuega ona o le felata’i o sootaga ile va o leoleo.
I lena taimi pei ona saunoa Auapaau, e tusa o le 24 ulugalii leoleo faaipoipo sa faigaluega faatasi lava ile Matagaluega.
I le faatalanoaga lea a le komesina ma le Leitio Polensia, na ia ta’ua ai le tele o faafitauli tula’i mai ona o lena tulafono i totonu o le Matagaluega.
Ua avea ose mafuaaga ua le faaipoipoina ai lava isi ulugalii leoleo, talu le popole i tuli ma le galuega.
Ma sa tele leoleo agavaa ma lelei na le toe faigaluega mai ai lava.
O lesi faafitauli na oo iai, o le le lava o leoleo, ma sa na’o le Matagaluega lava o Leoleo na faamalosia ai lea tulafono, ua tatau ona aveese nei lea faiga faailoga tagata.
