E na’o le tasi i le lua taseni fuamoa o loo faataga ona faatau e le tagata mai le faleoloa o Frankie i Lotopa, lea o loo maua ai le Sunshine Eggs. Ua siitai atu ai i le $15tala i le taseni fuamoa i Savaii, ae ole oloa o loo gaosia lava i Samoa.
O le mafuaaga tonu lava lena ole tatou sailiga ma fesiligia ai pe aisea, ua siitai ai le tau o le fuamoa i Savaii, ae e le’o se oloa o loo faatau mai fafo, pei ona siitai ai le tau o le tele o oloa faatau mai fafo (imports) ma tuuaia ai le taugata o vaa oloa mai fafo ua iai nei, e mafua ai le siitai foi o le tau o oloa mai fafo.
Talu le sioki ole fuamoa i Savaii, ua amata ai ona faatau ta’itasi e aiga fuamoa, fua lava ile kuka e mana’omia ai, peita’i ua siitai ai foi male tau o le fuamoa e tasi mai le 80sene ile $1.50 i faleoloa ile Itu o tane Savaii.
……………………………….
Ua taofia ai mo le taimi nei le sapalai o fuamoa i Amerika Samoa a le Sunshine, ae sei tau faamalie le maketi i Samoa nei.
I le faatalanoaga ma le pulega o le Sunshine Eggs i Samoa nei, ma ta’ua ai le taumafai ole kamupani fuamoa e faamalie le sapalai ma oka mai Amerika Samoa, ae o loo tau faasoasoa foi fuamoa i Samoa nei.
I le lipoti a le Samoa News i Amerika Samoa o ta’ua ai, le taofia o le uta o fuamoa na avatu i Samoa e le vaa o le vaiaso taluai, ae o faia iai se faatalanoaga.
O lipotia mai, na taofia i lalo ose poloaiga a le sui o le USDOA i Amerika, ma faatonu e faatama’ia le uta.
Na fesiligia e le Leitio Polenisia le Pule o le Sunshine Eggs i Samoa nei, afioga a May Frankie i lea tulaga. Ma ia saunoa: “O le vaiaso talu ai na oo mai ai le logo i le mataupu lena, peita’i e le’o mautinoa pe aisea ua faafuasei ai ona tupu. Ae na uma loa ona saini le MOU i le va o Samoa, a le Atoa o Samoa, ma amata atu ai foi ona faatau atu a latou fuamoa i Amerika Samoa.
“E le’o se uta muamua lea ua avatu i Amerika Samoa”
I lipoti mai Amerika Samoa o loo fuafua le fono a le komiti faapitoa i Amerika Samoa e tagai ai ile tulaga o le avatu o fuamoa i Tutuila, ma tapa ai se kopi o le maliega, poo le MOU na saini ele Atoa o Samoa e avatu ai oloa pei o fuamoa ma aano o manufasi, pei o povi.
I faamaumauga, ole mataupu lea na saunoa ai le afioga i le Palemia o Samoa, Fiame Naomi Mataafa, i le taimi na saini ai le feagaiga, MOU i Taumeasina, i aano o manufasi, pei o povi, “o le a avatu ai o se faata’ita’iga mo se taimi e mata’itu ai lona tulaga faaauau.”
Peita’i ole faatau atu o fuamoa i Amerika Samoa, lea na saunoa le pule o le Sunshine Eggs, na faataga mai loa e le MOU na saini e le Atoa o Samoa, ile tausaga talu ai, ma amata ai loa foi ona faatau atu a latou fuamoa i Amerika Samoa. I le faatalanoaga lava lea a le Leitio Polenisia ma le pule ole Sunshine Eggs, na ia ta’ua ai “e leai se mea o iai, aua e le’o lava foi a tatou fuamoa iinei. O lea lava e tau faasoa le fuamoa, e ui lava o oka na aumai (mai Amerika Samoa) e le’o mafai ona sapalai uma.
“Na aumai le tala i le vaiaso talu ai, ua fetaui lava aua e le’o lava fuamoa (i Samoa nei i faleoloa) e na’o le tasi lava pe lua taseni e mafai ona faatau e le tagata.”
Na faamaonia mai e le Afioga i le Minisita o Faatoaga ma Faigafaiva , Laaulialemalietoa Leuatea Polataivao ina ua tatou fesiligia i le taofia o fuamoa atu i Samoa mo Amerika Samoa, ma ia ta’ua e le’o iai se faaletonu o tupu.
Ae o le faaaliga mai le Konesula o Samoa i Tutuila, Susuga a Fata, i lana sootaga ma le Sui Faatonusili o le Matagaluega o Faatoaga a Amerika , “ua release uma i tua fuamoa na avatu i Samoa.”
Ae o le fuafuaga e taofia mo le taimi nei le sapalai a le Sunshine, se’i faamalie maketi i Samoa mo se taimi ona toe faaauau ai lea.
Ae o loo fagasolo pea trials o le Atoa o Samoa, poo a mea e faaleleia mo le agai i luma. “
