O le lima masina mulimuli o le soifua ole tama ia Tagaloasa Filipaina Faisauvale lea na ave iai e leoleo le saolotoga e mafuta ai ma lona aiga i Faleatiu ina ua iloa aafiaga o lona gasegase.
Na amata atu lava i le falepuipui i Tafaigata ona tuli faasalaga soloatoa ole tama lea ma magalo, peita’i na toe faaauau atu ai ile falepuipui fou i Tanumalala lesi foi soloatoa lea e tatala ai nei i tua o tuli.
O le tali a le Sui Komesina o leoleo, Auapaau Logoitino Filipo, ina ua tatou fesiligia, ile aiaiga na tatala ai le tama lea i tua.
“Ua tatala i tua ona o le agaga ootia ma le agaga o le alofa iai, ma fai ai le faatatau e alu e mafuta isi ona aiga. E alu lava i tua, o loo iai le warrant.
E maliu nei o loo taoto lana talosaga i le palola ia Mati, ae ua tupu mai le poloaiga o le Koviti ma tapunia ai galuega, na le taunuu ai foi ma le valaauga o le palola ia Mati.”
Saunoa Auapaau, “masalo ana iai se palola e alu a i tua si tamaloa.”
Peita’i sa tele taimi e molimauina ai le avatu e leoleo o le Susuga Tagaloasa ile falema’i tele ole Tupua Tamasese Meaole i Motootua. Ae ole masina o Tesema o le tausaga talu ai, 2021, na fai ai le fuafuaga e tatala i tua le tama lea, ina ua ogaoga aafiaga o le gasegase tumau sa aafia ai.
Na faamaonia mai foi e le Sui Komesina , ole aiga lava na avea le latou tama i le falemai, e leai foi ni leoleo na o iai ile taimi na taoto ai ile falemai, ma maliu ai.
E le’i manuia le taumafai mose faatalanoaga ma le uso o Tagaloasa, le Susuga Sialei o nofo ai ile aiga, o ta’ua e lona tauaiga, ua tele le afaina o lagona o le latou aiga i faasalalauga ma tala ua agia i tusitusiga ale au faasalalau.
