Amata faiga filifiliga a itumalo o Siumu, Faleata 4 ma Vaa o Fonoti

SHARE NOW

Na faamuta ai i le ta o le 12 o le aoauli ananafi faatosiga o le faiga palota a Faleata 4, Siumu ma Vaa o Fonoti.

Peitai o le aso lea ua faamauina ai le amatalia lea o palota muamua, o tagata matutua ma e iai manaoga faapitoa, ae o tagata e faigaluega ile aso tonu o le palota lea ua faamautuina e faia ile Aso Faraile 15 o Setema.

Ae ua faamanatu mai e le Ofisa o faiga palota, e na o i latou sa resitala atu i le ofisa mo le palota muamua e mafai ona faatinoina le latou palota i le asō.

E tatala falepalota ile itula e 9 ile taeoa nei ae tapunia ile ta o le itula e 4 ile afiafi, mo le itumalo o Faleata 4 ua atofa ai le maota o le Ekalesia EFKS i Toamua,

Ae mo le itumalo o Siumu e faia lea ile VOC Siumu Sasae, ma Vaa o Fonoti o le maota o le Ekalesia EFKS i Taelefaga.

O palota laiti, o Siumu, Faleata fa ma Vaaofonoti, ua afua ina ua savali ese faipule na manumalo mai lalo o le fu’a a le HRPP, ma ave iai le faatuaga a latou itumalo e tauva ai mo le FAST, i faigapalota laiti ua alo atu nei iai.