Na tatala aloai ai ile afiafi ananafi le fonotaga lona 31 a Ofisa o Mataupu o le siosiomaga a le Pasefika poo le SPREP ile faletalimalo le Taumeasina.
I le pepa o faamatalaga ua faamanino mai ai o le auga o lenei Fonotaga ia fefaasoaai ai finagalo ma manatu o sui auai o atunuu e 21 o le Pasefika.
I mataupu e faatatau i le taitaiga o le Faalapotopotoga atoa ma le pasia o le fuafuaga faataatia mo le 2024. Ma saunoa faapitoa ai le tamaitai Palemia o Samoa le Afioga Fiame Naomi Mataafa e faamanino nisi o vaega taua o loo manatu Samoa e ao ona tagai iai, ma ia laualuga i talanoaga a Minisita o Siosiomaga o atunuu o le Pasefika o loo auai mai.
E aofia ai ogasami o Samoa ma le Pasefika, o suiga ogaoga o le tau ua vaaia i le taimi nei, ae o kasa oona afua mai i fale gaosi oloa tetele, ua aafia ai le ea o loo manavaina e o tagata soifua ma aafia ai le soifua maloloina.
Ma o se avanoa lelei foi lea e avatu ai se tuualalo i sui mai atunuu tai tasi i le itu tau le siosiomaga ao faagasolo ai lenei fonotaga ile vaiaso nei.
