6 Ianuari 2025, Samoa Ua toe tatala ai galuega a matagaluega a le malo, mo le amataga aloaia o latou galuega o le tausaga fou, 2025.
E toe foi uma ane ai ana tagata faigaluega, mo le tautua masani ai.
Mai le taimi o aso malolo pei ona molimauina le tiute leoleo, mo le puipuiga o le saogalemu.
Peita’i o aiga lava ma tagata taitoatasi na lipotia le faavevesi ma afua ai faalavelave pei o maliu faafuase’i ae ua aulia mai le tausaga fou.
E le’i maua se tatou tali mai pulega ole Toomaga poo le SVSG Samoa Victim Support Group, i le lipoti o aso malolo.
Peita’i na taua e le tatou paaga e iai lona sootaga valalata i galuega faatino a le SVSG, na filemu lava le taimi o aso malolo o lenei tausaga i mataupu vevesi o sauaga faasaga i fanau na taunuu atu ile ofisa.
Vagana ai mataupu masani ile va o ulugalii.
E alu alu lava le faatalanoaina o se tina, ae tata’i lava ina so’otaga i fualaau faasaina e aofia ai le aisa.
Na ta’ua e le tatou paaga lea, o le faaletonu lena lea ua numela tasi nei i le mafuaaga o sauaga, o fualaau faasaina.
O le sailiga o le tafu’e o sauaga i aiga, ua afua ai ona faatu le faalapotopotoga ale SVSG youth. Poo talavou a le Toomaga, lea ua see atu i nuu, e fai le sao o talavou, i galuega faatino o auala e aoaoina ai talavou ile taofia o sauaga.
Ia oo atu ina fai aiga ma fanau, ae ua aoaoina latou i auala e faititia ai sauaga i totonu o aiga.
Peita’i o ta’ua e le tatou paaga lea e sootaga ile Toomaga, ua mautinoa lava o le aisa ma isi fualaau faasaina lea ua afua ai le tele o sauaga faasaga i tina ma fanau, e tusa ai ma faamaumauga a le SVSG.
O le tausiga o le filemu ae o le saogalemu o le galuega fai fa’atasi ma le matagaluega o leoleo, ma isi matagaluega a le malo, ua amatalia ai ile aso a latou galuega.
