Tala toe tuliloa o Kilikiti faasamoa o le Sisigafu’a 60 tausaga o Samoa ma le Teuila 2022, o loo faasolo ai Saipipi Savaii ile vaiaso nei. Tatala i aga masani ai o le savali faaaloalo ma le sauniga lotu, e faamanuia ai le faamoemoe ia sao ma uli.
O le upu faamalosi’au mai le Pesetene ole Liki, Susuga Fiu Siolo, ia faatamatane le taaloga ia maua le fealofani, ma faaauau ai lenei soo i afioaga o Samoa e ala ile taaloga kilikiti .
Na talamalae ai le au le Vainuu mai Faleu Manono, e tata muamua ae tali tua ‘a le au a le Laulelei o Amoa mai Saipipi.
Ta aga ale Vainuu, na latou maua ‘ai 40 ae 19 le pe.
Tuli e le Laulelei o Amoa mai Saipipi, e fitu pe ae maua ‘ai e 41, ma ‘uma ai le taaloga a ‘au na tala malae.
E tuufaatasia le tatou tala nei, o loo taaalo isi ‘au pei ona lipotia mai e le Susuga a Tapusoa Faafia, o le Sooupu faapitoa a le Liki kilikiti faa Samoa 2022.
O taaloga Kilikiti Faasamoa, ole liki o le Sisigafu’a o le 2021 o loo mau mai ai le Siamupini ile au a le Tanifa o le Vao mai Sili Savaii.
Na manumalo ai ile la taaloga o le talita ma le au a le Maaseugogo mai Fusi Safata. O le vaiaso nei le Pool A, ae Pool B le vaiaso fou, e faatoa taaalo ai le Maaseugogo.
