A’o faatauloto le numera vili fua ole Ola 800-7874

SHARE NOW

Ua le tasi pe lua tina sauaina o loo soifua mai nei lava talu le numera 800 7874.

Faapena foi i fanau pepe ma fanau talavou o loo soifua mai nei lava talu le laina vili fua lea o le 800 7874.

E tolu soifua mu’amu’a male tina nofotane na lavea’i ele laina telefoni, 800 7874 ile amataga o le vaiaso mai le atu Safata.

E ui e na’o le tasi le tatagi a le telefoni ile vaveao o le Aso Sa, mose lavea’i, ae le’i faigata ona su’e e le Response Team a le Samoa Victim, poo le vaega ‘au lavea’i a le Toomaga mo e puapuagatia le nofoaga tonu na sau ai le valaau.

Atili faigofie le misiona lavea’i ile faapaaga ma leoleo na tu malosi mai i lea taimi.

O le faafetai tele lena a le Peresetene o le Toomaga mo e Puapuagatia, Siliniu Lina Chang, ile kamupani a le Digicel ma le Vodafone, ile latou foi auaunaga faaauau e ala ile telefoni fua mai o tagata e fia maua fesoasoani.

I famaumauga, ua mae’a soalapule ma te’a i tua lesi tina ma’itaga mai Siumu na lavea’i mai foi e le laina telefoni i le vaiaso i luma atu.

Ile pepa o faamatalaga a le Toomaga mo e Puapuagatia,  o ta’ua ai,  le fetuleni ma o mau sauaga i totonu o Aiga ile taimi ua faasolo ina faiifo tapu o le koviti.

O mataupu ia o sauaga, sa tele inafaaui mai le laina telefoni, aua e 24 itula e ola ai.  I famaaumauga, ole tele o valaau fia maua fesoasoani, e mai le tamaitai 19 tausaga i le 39.

Sa aumai lava e le vaega lavea’i i totonu mo lo latou saogalemu, ma a latou fanau.

O tapenaga masani ai lava mo tina ma fanau sauaina e aumai i totonu, e aofia ai le siaki a le falemai, mo le togafitiga o tina manunu’a ma faasee atu ile galuega a leoleo, e faapepa aloaia ai le tagi , ma faasolo ane i le vaega o le fesootaiga ma lagona .

E fai si umi o faasolo i laasaga ia aemaise o tina ma fanau, peita’i e mataituina foi ata mua poo ulua’i foliga vaaia ile tino ma le mafaufau.

O ta’ua foi e le taitaifono ole Pulega faatonu ole toomaga, SVSG Board, faletua ia Georgina Lui, le fesoasoani tele ole matagaluega a leoleo i le latou faapaaga , ma le matagaluega o le soifua maloloina. Faapena foi i kamupani telefoni ile atunuu,. Digicel ma le Vodafone ile ola pea o le laina telefoni 800 – 7874 mo  tagata sauaina e valaau ane ai.