Ua molimauina le amata ai nei foi ona faatalale i le faiga o tali fofoga ma le faaalia lea o pepa tui, atoa ai ma le tutu va va va pe a agai i i faleoloa ma nofoaga faitele ina ua talatala ai i tua itula taga ole tatou tapu o le koviti i lona laasaga lona lua o iai nei.
Ae ua molimauina mai e le Sui Komesina o leoleo ma Falepuipui, Auapaau Logoitino Filipo, le taape ai ile Aso Lulu o le vaiaso nei, o le nofo tasi a leoleo sa faia i ona ofisa autu i le taulaga ma tua atu, aua leoleoga o le saogalemu ole tatou atunuu lautele, mai le soona feoa’i ma pipisi tele ai le faama’i.
Peita’i o le itu tonu lava lea o loo ave iai le faamamafa ole fautuaga a le afioga ile Palemia Fiame Naomi Mataaafa, aua lava le malu puipuia o le tatou atunu mai le faamai koviti 19.
Samoa e, o lo’o mauāluga pea le fa’atāua i le fa’atinoina o o tatou tui puipui. E ao lava ona tulituliloa o tatou tui, ma saga matimati puipuiga fa’asoifua mālōlōina, e pei o le faia o puni fofoga, fa’aālia o pepa tui, tutū ma nonofo vāvā, ma taofiofi le so’ona feoa’i ma tumutumu i nofoaga faitele.
Matou te talitonu, e opo lo tatou puipuiga pe afai tatou te lalago fa’atasi e fa’atili foe mo le a’e e ala i le tausisia o vaega tāua ua folasia mai e le Matāgaluega o le Soifua Mālōlōina. O ataata lava ia, tatou fa’asolosolo atu ai i le talatalaina o vavao i le lumana’i, i lalo o le La’asaga fou – o le soifua fa’atasi ma le Koviti – 19.
E le’o tuumamaina foi e lana afioga i le taitai o le malo, aiga ma fanau faapea le paia tauaiga o tagi mai ala o matua tausi , aemaise o pele a aiga, ua maliliu ai ona ole faamai tele ua aafia ai le lalolagi ma le tatou atunuu. Ina ua silia ai nei ile sefulu matua a Samoa ua maumau ai soifua. Ma ia toe famafanafana atu ai, i aiga loto faavauvau.
“E lē māmā ia te a’u nei le atunu’u pelē, i latou ua māliliu ona o le fa’ama’i, aemaise lava o le to’atele, o ō tatou matua tausi. E momoli atu fa’amafanafanaga ma fa’amaisega mai le tatou Mālō, mo aiga ma fanau pele ai i latou ua māliliu.
Ua na’o le Atua tatou te maua ai le loto tetele ma utu ai le fa’avauvau, a’o tatou folau i nei vaitau sousou.
Samoa e, e ui i le galuā o la tatou folauga, e lē avea lea ma ala e fa’ava’a tu’ia ai lo tatou fa’atuatua ma le fa’amoemoe pea i le Atua, na te ta’ita’ia la tatou faigāmalaga. Ia tatou folau pea ma le fa’atuatua, auā o lo’o soifua lo tatou Atua, o Ia na te lavea’i mai.”
