E ofoofogia vavega na faia e le Atua o tapua’i iai Samoa, i le vaeao ole aso fou, le lona 24 o Me 2022 i le malae ole faausugatagi a Samoa i Tiafau Mulinuu.
Ole lima i le taeao na potopoto ai faipule ole FAST, i luga o le faavae ole Maota fono ma vaaia ai le faamalumalu ifo ale ao uliuli tele, ma foliga ole’a pa’u ifo i lalo.
Peita’i e amata loa le sauniga ae oso faafuasei le la’i ma sasa’e ma tulei ese atu le ao tele lea i Sisifo ae amata loa ona malama mai itulagi i Sasa’e.
Ua tafia le ao ae ua amata foi le lotu fafetai ua malama moliga’o, ma solosolo ai ina lua viiga o le Atua na fofogaina e aofia potopotoga.
Ole upu mai le afioga a le Atua ma faasolo i le tima’iga ma to manatuga mai le taitai ole sauniga, afioga i le fofoga o le Maota, LI’o Papalii Taeau Masipa’u.
Na ma’ea le tatalo ma valaau aloaia loa le Afioga ile Palemia , Fiame Naomi Mataaafa, ae amata loa ona ma’ulu mo nai sekone, ma pa’u ifo loa uaga maligi mo nai minute, na saunoa le afioga i le taitaifono Laaulialemalietoa, o uaga o faamanuiaga.
Ose molimau puupuu o le uiga ese o vavega na faia e le Atua i le taeao i Mulinuu.
O le faapotopotoga ile vavaeo i le malama o moliga’o e sii a’e le viiga ma le faafetai ile atoaga o le 1 le tausaga talu ona taitaia Samoa e le faigamalo fou a le FASTna faatauto i lalo ole lagi ma ao na faamalumalu i le faleie na tutusi ai aao ole osi ga feagaiga a faipule e 26 o lena taimi ma oo mai ai nei ua 31.
Ole sauniga faafetai ole vaveao, sa auai faipule uma o le vaega faaupufai a le FAST, ma se vaega o lana tapuaiga e aofia ai ma afioga i Tama Aiga, ile Tuiatua Tupua Tamasese Efi, Susuga ile Papaliitele Titiuatoa Malietoa, o afioga i loia na faatautaia le faatautoga, Afioga a Taulapapa Brenda Heather Latu male Susuga a Matafeo Latu, ma isi.
O le fai lotu, oleAfioga ile fofoga fetalai, Lio Papalii Taeu Masipa’u na taitaia le sauniga faafetai.
ole atoaga o le tausaga talu ona faatauto aloaia le palemene 17 o Samoa, ma usu ai lana fono muamua i luga o le faavae ole maota fono o Samoa ile mamalu o fisaga o lagona ole olioli o lea tauafiafi, 24 Me 2021, e manatua pea.
Ae: O le maota foi lea o le fono faitulafono a Samoa i Mulinuu, o le’a usu ai le fono faapitoa ile aso.
Ole autu lava o le valaau ai o le fono ole aso, 24 o Me 2022, e tuuina aloaia ane ai le lipoti a le komiti faapalemene o amio taupulea.
Lipoti o le taunuuga o le latou suesuega ile tusi faitio a le faipule o Gagaemauga Numera 1, o le Minsita o tiute, ma tupe maua, o le sui Palemia, Afioga Tuala Iosefo Ponifasio.
Faasaga i le faipule o Lepa, ma le faipule o Faleata 3.
O le fono foi ole taeao nei, o talia ai se taunuuga ole faaiuga a le fofoga fetalai i lesi foi tusi faitio,
na ia saunoa o le a sei tagai iai, pe o iai ni vaega ole tulafono tumau o le maota o aafia ai ile faitioga ma ua avatu foi le avanoa i le faipule o ave iai le faitioga e tali ane ai.
