Aumai foma’i faapitoa mai Saina ma Initia e fesoasoani ile utiuti o Fomai a Samoa.
O Saina ma Inisita lea ua faamaonia mai e le Minisita o le Matagaluega o le Soifua Maloloina le afioga ia Valasi Tafito Selesele lea ua fuafuaina e auina mai ai ni foma’i fa’apitoa e galulue mo le auaunaga tau soifua mālōlōina i le atunu’u.
O le auga ua aapa ai le Matagaluega e aumai fomai faapitoa nei e toaono ma galulue i Samoa nei, pei ona saunoa le Minisita, sei fesoasoani lea ile to’a gaogao o le aufaigaluega ile tautuaina o le atunuu i taimi e matuai manaomia ai le auaunaga.
Ae le gata i lea o lea maua ai foi nisi o tomai fou e fomai o le Matagaluega o loo galulue le taimi nei aua le faaleleia atili pea o le auaunaga
Peitai o lo’o faia pea le galuega fai faatasi a le Matāgaluega o le Soifua Mālōlōina, o le P.S.C. ma le Matāgaluega o Tupe, e fa’atulaga le mafai lea ona galulue ma a’o’oga pea foma’i ma tausi soifua o lo’o i le Matāgaluega, e fa’alautele lo latou silafia, auā le fa’aleleia atili o le galuega faa tausi soifua.
“E lē fou, le utiuti o foma’i, ae o le va’ai mamao a le Mālō, ia sa’ili auala talafeagai, e fofō ma fa’aitiitia ai lu’itau o lo’o feagai pea ma le Matāgaluega i aso ta’itasi.”
Aua o nisi o tausi soifua sa galulue ua faamavae ona o le agai atu i nisi o galuega pei o galuega faavaitaimi, galuega i isi Matagaluega a le Malo, ae o faalavelave foi faaleaiga, ma nisi o tofiga ua valaau faapitoa ai nisi o tausi soifua.
Saunoa Valasi o le manatu maualuga o le Malo ia matuā si’itia le auaunaga a le soifua mālōlōina e tali atu ai i le mamalu lautele o le atunu’u, o lo’o autova’a atu mo se fesoasoani mai lea taimi i le taimi.
Ma ua iai le faamoemoe e taunuu mai nei fomai ile tausaga nei.
