Ua faasolo i le lua masina talu ona ave aso malolo o le CEO poo le Ofisa Sili o le STA poo le Pulega o Tulisi a Samoa, Faamantuaina Suifua Lenata’i, ao o loo talia pea lava foi se taunuuga o le suesuega na faia faasaga ilea tamalii e le STA Board poo le Laulau faatonu a le Pulega o Tulisi.
Talu ni faitioga, mai le tagata faigaluega ma se tasi foi na galue ai ile Pulega o Tulisi a Samoa. O tuuaiga faasaga i le ofisa sili e aofia ai le se konekarate 10afe tala na ave ise kamuta, o loo teena e le Faamatuainu.
O loo iai tatou kopi o faasea e tolu na faaulu i le pulega faasaga i le Ofisa sili, ma tuuaia lona ave oni meatitino a le malo i lona fale, pei o sima , apa, maa fola ma plywoods. O loo teena uma foi e Faamantuainu lona faia o na tulaga ole aveesea o mea totino a le malo.
Na faamanino mai e le Minsita o Faalapotopotoga a le Malo, Leatinuu Wayne Sooialo, “o loo ave aso malolo faapitoa a le Ofisa sili ,”
“Ma ua uma foi ona tuuina atu le lipoti o le suesuega a le Laulau ole pulega ole Tulisi ile Ofisa sili, e tali ane ai ile lipoti lea.” Ma o le taimi lava e avane ai se tali a Faamatuainu o le’a avatu loa i Minsita, e faaoo atu le mataupu lea ile Kapeneta.
Na molia foi e leoleo le Ofisa sili ile tolu masina talu ai ma faamaonia e le Sui Komesina, Papalii Monalisa Keti. O tuuaia i lona lafo oni tala faatiga ise tasi o le aufaigaluega, Kilisimasi Tunufa’i ona ose faaletonu na tupu ia Tesema 2021.
