I le lipoti a le Matāgaluega o le Soifua Mālōlōina mo lenei fitu aso (tasi le vaiaso) ua fa’amauina ai e to’a 95 i latou ua pesia i le siama o le Koviti – 19 i totonu o Samoa, e tusa ai ma faamaumauga mai le 2:00 i le aoauli o le Aso 26 o Iuni I le 2:00 i le aoauli o le Aso 03 o Iulai, 2022.
E 14,848 i latou mai i le mamalu lautele o le atunu’u (community transmission) ua fa’amauina ua pesia, ae 148 le aofa’i oi latou na faimalaga mai i totonu o Samoa ua fa’amaonia ua a’afia i le fa’amai.
Ma ua si’itia ai le aofa’i o e ua a’afia (community & border) i le fa’ama’i i le 14,996.
I le iai ai pea o Samoa i le la’asaga muamua (Alert Level 1) mo poloaiga o Fa’alavelave Tutupu Fa’afuasei, o lea e tu’ualalo atu pea i le mamalu o le atunu’u ina ia tausisia pea le faia o tali fofoga, tutū ma le nofo vāvā mo le lua mita mai le isi tagata, fufulu mamā lima pe a mae’a ona tagofia ni meafaitino ina ia fa’aitiitia ai le so’ona pepesi o le siama.
E tumau pea fautuaga mo le atunu’u atoa ina ia aga’i i se falema’i lata ane mo le faia o tui puipui o le Koviti – 19, auā o le puipuiga sili lea mo i tatou e tete’e atu ai i le ma’ema’eā o lenei vairasi.
