I le lipoti a le Matāgaluega o le Soifua Mālōlōina i totonu o le 96 itula mai le 2:00 i le aoauli o le Aso 21 o Iulai e agai atu i le 2:00 i le aoauli o le Aso 25 o Iuni, 2022, ua fa’amauina ai e to’a 56 i latou fou ua pesia i le siama o le Koviti – 19 i totonu o Samoa.
Mai i lea fuainumera, e to’a 54 e mai le mamalu o le atunu’u ma le to’a 2 na malaga mai i totonu o Samoa ua fa’amaonia ua pesia i le fa’amai. Ma ua si’itia ai le aofa’i o e ua a’afia i le fa’ama’i i le 15,374. Ua lipotia mai e le Matāgaluega, e to’alima (5) i latou o lo’o fa’anofoesea i nofoaga fa’apitoa ma le to’atasi (1) o lo’o i le Potu Tigāina (I.C.U.) i le Falema’i i Moto’otua.
I le fa’amalosia pea o puipuiga mo i tatou e tete’e atu ai i le ma’ema’eā o lenei vairasi, e fautuaina ai pea le mamalu o le atunu’u ina ia aga’i i se falema’i lata ane mo le faia o tui puipui o le Koviti – 19.
E tumau pea fautuaga mo le atunu’u atoa, fa’amolemole ia tausisia fautuaga ma lapataiga mai le Soifua Maloloina e tu’uina mai i taimi uma.
