26 Novema 2024: Ua amata ai nei ile aso, ona agavaa o tatou tagata mai le 75-100 tausaga le matutua ona talosaga io latou sitiseni Niusila.
Pe afai na soifua mai ile aso 13 Me 1924 ile aso 31 Tesema 1948, poo isi agavaa o mulimuli mai.
Ma totogi le talosaga e $204.45NZD.
E fa vaega e mafai ona e agavaa ai,
1: pe afai na e fanau I Samoa ile aso 13 Me 1924 – 31Tesema 1948.
2: o oe ose tamaitai, ma sa e fanau ile taimi faatulagaina o taua I luga, ma sa e faaipoipo ise alii o loo agavaa ile vaega muamua ole tulafono.
3: Ete agavaa ile sitiseni NZ pe afai, o ou matua na fananau I Samoa ile taimi faatulagaina, 13 Me 1924 – 31 Tesema 1948 ma sa e fanau ile taimi o le pulega a Peretania.
O le taimi o le pulega a Peretania e aofia ai ona teritori, ae le taulia ai i latou sa fananau i le uma ane o le latou pulega, poo tua mai o tausaga ua agavaa ile tulafono, o taua i luga.
4: ete agavaa pe afai o oe ose tamaitai ua faaipoipo ise alii o agavaa ile vaega tolu o le tulafono, poo se alii na fanau i le taimi faatulagaina, 13 Me 1924 – 31 Tesema 1948.
O aiaiga i luga mo agavaa ole Samoa,
Ina ua mae’a sainia ai e le Kovana sili o le malo o Niusila le teuteuga ole pili e avea ai ma tulafono na pasia e le palemene o Niusila ile faaiuga o le vaiaso talu ai.
O se laasaga ua le agavaa iai le tele o tuaa ua tofafa mai tuugamau, peita’i e silia ile 3,000 tagata Samoa lea o le’a faaopopo I le lisi o penefiti a tagata matutua mo le malo o Niusila.
Peita’i e ao ona oo atu i Niusila le tagata ua sitiseni mo le agavaa ai i penefiti.
O nisi o matua o soifua mai pea i le taimi nei i Samoa e le’o toe mafai ona feoa’i pe tietie foi ise vaalele ona ua matutua ma tausi esea.
Ae o ta’ua e le tatou sooupu mai NIusila, e mafai ona talosaga atu i Samoa le siitiseni ma maua ai le tusifolau, ae tatau lava ona i totonu o Niusila, mo le faagaioiga penefiti e agavaa iai.
E iai matua Samoa o loo i NIusila ile taimi nei, na malaga asiasi I a latou fanau, ma ua fetaui lelei ma le mealofa o le Kilismasi a le malo o Niusila, o lona sitiseni.
E manatu lona aiga, ua ose faafetai tele, ua tupu ane lea faamanuiaga, ma le asiasiga a le sa’o ae o le tama matua o le latou aiga i Niusila.
O lona uiga e maua lona lona tusifolau Niusila malaga mai ai mo le faiga nofo a lona aiga ile uma ane o le kilisimasi 2024.
