Ua faamaonia mai e le Minisita o le Matagaluega o tina ma tamaitai, atinae o nuu ma agafesootai, le afioga ia Mulipola Anarosa Ale Molioo i le leitio Polenisia, o le Aso Tofi o le vaiaso nei o lea faatino ai le sainiga lima faapitoa e tau aao ai se vaega tupe o le poloketi miliona tala lona lua a itumalo e 22.
O itumalo na ua maea ona faamatuu iai a latou miliona tala muamua, ua mautu o latou fono faavae, ma ua faamalieina foi aiaiga ma taiala e tatau ona uia muamua ao lei faamatuu atu iai se vaega tupe.
Faailoa mai foi e le afioga Mulipola e toatele itumalo mai Savaii o loo aofia i totonu o le 22 itumalo o lea auai mai e faia le sainiga lima faapitoa ao lei amata faamatuu atu le miliona lona lua.
“Ia o le Aso Tofi o le vaiaso nei, e faia ai le saiiniga lima ma itumalo e 22 lea o lea faamatuu le vaega muamua o le poloketi miliona tala lona 2,”
“O lea faailoa atu foi i le Aso a taeao itumalo ia e 22, ae o le tele o itumalo o loo aofia i le 22 lena o itumalo mai le tatou motu tele i Savaii,”
O le Sini Autu, o lenei poloketi ia faaleleia le atinaega o le soifuaga lautele mo le manuia o tatou tagata, ma e amata mai lea i le atinaeina o itumalo e faaaogaina ai lava o latou aao, taimi, malosi, tomai poo le agavaa ae le gata i lea, o le faaaogaina o le oa faalenatura ma le siosiomaga e pei o laufanua, vaitafe ma le sami ua foai e le Atua i lea itumalo ma lea itumalo.
O le faamoemoe o le Malo, e pei ona maioio i lana Taitala mo le Lumanai Manuia o Samoa:
- Ia faaitiitia le mativa ma le le tagolima
- Ia faaleleia le soifua maloloina mo le lautele
- Ia lelei aoaoga
- Ia faaaupegaina tagata i avanoa mo le soifua maloloina
- Ia unaia atinae i totonu o nuu ma afioaga e pei o faatoaga, faiga faiva ma faasao, atinae o tagata tafafao mai fafo faapea atinae o pisinisi laiti.
