E $10.0 miliona tala le sao o le tatou Malo e tauala mai ile Faalapotopotoga o Eleele o Samoa ua faamatuu atu nei mo le amata fausiaina o le maketi fou i Savalalo, e ese mai i le $20miliona tala Samoa ua foai mai foi e le malo o Niu Sila mo lea lava faamoemoe e pei ona faapaia i le aso ananafi le suaina o le eleele.
O lenei galuega ua fuafua e 18 masina e fausia ai, o lona uiga e tatau ona maea lona fausiaina i le masina o Aokuso poo Setema 2025.
Peitai na saunoa foi le Palemia e faamanino le tau o le galuega, ma le kamupani o le a faatinoina.
“O le tau aofa’i o le galuega e tusa ma le $24.9 miliona tala, ma ua manumalo ai le Kamupani ale Zheng Construction Company Limited i le maea ai o le tauofoga ale Malo.
O le nofoaga lea sa iai le Maketi tuai ma ua tele tausaga o faaaoga pea, peitai na faagata lona toe faaaogaina e avea ma maketi ina ua aafia i se mu i le 2016.
