E $37 miliona le siakitupe na tuuina atu ele malo mai le Pulega o Uafu

SHARE NOW

E $3.7 miliona le siakitupe na taulima ina e le tamaitai Palemia mai le Pulega o Uafu, i le faaiuga o le vaiaso ua tuana’i, sa tauaao atu e le Minisita o Galuega tetele ma Pulega o Uafu le tofa Olo Afoa Fiti Vaai.

I se pepa o faamatalaga oloo faamanino mai ai, o lea seleni tele ua mafai ona maua e le Malo mai le aofaiga o tupe faasili a le faalapotopotoga e $10 miliona 679 afe 925 tala na aoina i totonu o le tausaga faaletupe i le masina o Iuni o le tausaga e 2022.

O le pulega o uafu o se tasi o faalapotopotoga tumaoti a le Malo ua maitauina le siitia o tupe maua mai ana auaunaga i tausaga uma, ona latou vavae ese lea o se isi vaega o ana tupe faasili lea e fai ma ofo atu i le Malo e fesoasoani mo ana atinae.

Ta’ua i le pepa o faamatalaga le agaga fiafia o le Pule Sili o Uafu le afioga ia So’oalo Kuresa So’oalo ina ua mafai ona totogi pe faasoa atu le manuia tautupe a le Pulega i le Malo e fesoasoani i le faasoa ma atinae a le malo.

Ua faaalia foi e le Minisita o loo tulimatai se isi siitaga i tupe faasili poo polofiti a le Pulega o Uafu, ona o le tausaga nei o le a faaopoopo le numera o vaa tetele e afea le atunuu, aemaise o meli la’u pasese.