E leai se itumalo ua mafai ona laasia taiala o le miliona tala lona lua o le poloketi a le malo, ae ua pasi le masina e tatau ona amata tala ai. O le saunoaga lea a le Minisita o loo faafoeina le faasoasoa mai o le poloketi i itumalo e 51.
Ae e 32 itumalo ia ua mafai ona tapa se vaega tupe mulimuli o a latou miliona tala ma ua faagasolo foi le faagaioiina o galuega ua uma ona tumatamaga e agatonu ai nei vaega tupe taitasi.
Peitai i le feiloaiga a tusitala ma le afioga i le Minsita o tina ma tamaitai i le aso ananafi i lona ofisa le afioga ia Leota Laki Lamositele, na ia saunoa ai o le tele o itumalo ua mae’a ona fautuaina a lata loa ina maea le faaogaina o le $425,00 muamua. Ona tapena lea o le lipoti atoa o le faaogaina o lena seleni ae tuumai i totonu mo le faia iai o sailiiliga a le Komiti.
E feauga lava le maea lelei o le faaogaina o le $425.00 muamua lena ae maea foi ma suesuega a le komiti ma toe faamatuu atu le isi $425.00 mulimuli ia aua ai nei motu le galuega ma atinae o loo gafa ma fono faavae a itumalo oloo faagasolo nei.
E ese mai le $150,00 na faamatuu muamua atu lava mo le fausia o fonofaavae, totogiina o tagata faigaluega i totonu o fonofaavae taitasi ma le faia ai o alauni o sui usufono tai toa 14 mai fonofaavae taitasi.
Saunoa Leota o Iuni sa tatau ona maea ai le faaogaina o le miliona muamua peitai ane o le tele lava o feeseeseaiga ma le le mulimuli lava i taiala ua maea tuuina atu mo le faatonutonu folau pea o le faaoga tatau pea o lenei poloketi.
