Ua fa’amaonia e le Matāgaluega o le Soifua Mālōlōina e 618 i latou fou ua pesia i le siama o le Koviti – 19 mai le 2:00 i le aoauli o le Aso 28 Aperila 2022 – 2:00 i le aoauli o le Aso 02 Me 2022.
I lea 618, o le 615 e mai le mamalu o le atunu’u lautele a’o le isi to’atolu na malaga mai fafo. Ma ua si’itia ai i le 10,210 le aofa’i atoa o le mamalu lautele o le atunu’u ma i latou na malaga mai fafo ua pesia i le siama o le Koviti – 19. E to’a 14 i latou o lo’o fa’anofoesea i nofoaga fa’apitoa i le Maota Gasegase i Moto’otua.
O I LATOU UA MĀLILIU ONA O LE KOVITI – 19
Ua fa’amaonia fo’i e le Matāgaluega o le Soifua Mālōlōina e to’atasi (1) le maliu fou ua fa’amauina, ma ua o’o ai i le to’a 20 i latou ua māliliu i totonu o le atunu’u ona o le fa’ama’i. O le ua maliu o se tinā e 91 tausaga le matua o le soifua, o lo’o i ai ona gasegase tumau ae ua o fa’atasi ma le siama o le fa’ama’i ma e leai sona tui puipui ua faia.
I le fa’aaloalogia ma le amanaia o tau ‘āiga ma fanau o le tinā ua maliu, o le a leai ai se isi fa’amatalaga fa’aopoopo e tu’uina atu i le tatou Mālō.
E fautuaina le mamalu lautele o le atunu’u ina ia tausisia ma fa’amalosia fautuaga masani ua folasia mai e le Soifua Mālōlōina e aofia ai le faia o tali fofoga, tausisi i le lua mita mai le isi tagata aemaise i nofoaga faitele, nofo lelei i le fale ma fa’anofoesea i se nofoaga fa’apitoa o lou maota pe afai ua masalo lou a’afia i āuga o le fa’ama’i.
E talosagaina fo’i le mamalu o le atunu’u ina ia afifio e faia tui puipui auā o le puipuiga sili lea mo tagata uma, e tete’e atu ai i le sosolo fa’aafi o le Koviti – 19. Tatou galulue fa’atasi e puipuia Samoa atoa, puipuia o tatou ‘āiga ma i latou e sili ona pele iā te’i tatou, ina ia ‘aua ne’i a’afia se tasi i lenei fa’ama’i.
