Ua sauni le au fai oloa o mea taulima Samoa e faatali le toe taunuu mai o le meli a le Ms Nautica i le Aso Lulu o le vaiaso nei, e atoa iai le 12 o meli la’u pasese ua afea uafu o Samoa i lenei tausaga.
O le meli muamua lava lea na afea Samoa i amataga o le tausaga lenei, ma o lea foi o lea toe tuta ai i le uafu i Matautu i le itula e 9 ile taeao ma lana pasese e 777 ma le au vaa e toa 373.
Ma ua sauni foi ma tapena le autalavou EFKS mai Satupuala e faafiafia ma faafeiloai i le toai taunuu mai o lea meli la’u pasese.
Ae ua sauni foi le Pulega o vaa Samoa e faatulaga fale ie o au fai mea taulima Samoa i se vaega o le uafu mo le faalauiloa atili atu o Samoa ma lana foi agaifanua ma le aganuu.
Ae ua faamaonia mai e le sui o le Pulega o turisi ua iai foi turisi o lea malaga mai le meli la’u pasese lea e nonofo mo nai tafaoga pupuu ao lei tuua Samoa mo Fiti.
O loo iai le faamoemoe e toe asia e le meli lava lea l e Ms Nautica laufanua o Samoa i le masina o Aperila o le tausaga nei i le aso 21.
