O aafiaga o lagona ma faaiuga fai a le tagata mai tala feavea’i ele au tusitala ma le au faasalalau, le mafuaaga o le faatalanoaga faalauaitele a alii ma faipule ole afioaga o Faleula, ma sina vaega o le au faasalalau ile vaiaso nei.
Ina ia faamanino ai se itu a le nuu, ma le latou foi taga’i ile faaletonu lea na tupu mai ile vaiaso talu ai, ile afioga ile faipule ia Loau, mase vaega o lona auaiga, e ana le faletaavale lea na mu.
E manatu sui o le afioaga o Faleula, e ao lava ona ave uma e soo se tagata faasalalau poo se tusitala itu uma e lua ose mataupu, ma faataua le sa’o atoatoa ose faamatalaga ave, e aveesea ai le faatupuina ole loto ita ma le tiga ae faavae mai i luga o le le malamalama.
I lea faatalanoaga a le afioaga ma se vaega o tusitala ma le aufaasalalau, i luga o le TV 1, o loo aumai ai se finagalo ole nuu, ae ole matai o le aiga e sootaga ile fanua na afua ai le fepa’iai o Loau ma ona tauaiga.
O le molimau a le tama e ana le faletaavale lea na susunu, i lana faatalanoaga ma le Samoa Entertainment TV, o le tagata lava na totogia tupe ile fanua, o ia e ana lena fanua.
Peita’i ile sailiga a tusitala ma le aufaasalalau i se tala mai le afioaga o FAleula, e le fou lea faafitauli ile fanua lea. Ua iloa ane ai foi ile faatalanoaga lava lea ma le matai e sootaga ile suafa matai o loo alu ai le fanua lea i luga, e le’o iai se isi i lenei taimi o nofo mai ile suafa o loo alu ai le fanua lea i luga.
E manatu le afioaga o Faleula, e ui ua uma ona vaevae ma totogi tupe a matai sa maua tupe i lena vaitaimi mo le 100 eka lea a Faleula, peitai o loo i lalo lava ole pulega a allii ma faipule o Faleula.
Ua taoto foi le faaiuga a le nuu, e le toe faatauiina ni fanua, talu ua iai fasi fanua ua faatau ese, ae o loo tupu le nuu. Pei foi ona augatata ai le komiti o fanua o le afioaga e talia ni talosaga mo na laasaga.
O le komiti o fanua a Faleula, lea o loo taitaifono ai le afioga ile Faipule ia Loau Keneti Sio, ua molimauina mai e matai o le nuu ile faatalanoaga ma tusitala, o lona lava tauaiga, lea na talosaga iai faatatau i le fanua o loo nonofo ai latou.
Peita’i ua agia, ile feiloaiga a tusitala ma le nuu, e iai foi isi tagata o loo nonofo ai i luga o lea oga eleele o lo o manatu iai matai fainuu, e sootaga foi ile fanua lava lea e tasi.
I faamaumauga o fanua tau Samoa, poo fanua faaleaganuu, e taatia i lalo ole vaavaaiga a le o lo o umia le suafa matai e sootaga ile eleele.
Faatusa i le fanua umia sa’oloto, e pulea ele tagata e ana le suafa oi luga ole pepa o sea fanua.
Ma fanua tau ile malo, o loo umia lava ma pule ai le malo.
Peita’i o ta’ua e le fono ale afioaga o Faleula, e le’o se gasegase o ananafi poo le aso le mataupu tau ile fanua lea na tupu mai ai le feeseeseaiga ile va o le faipule ma se vaega o ona tauaiga.
Ua faataatia ai le faaiuga a le nuu, e mul e foaga faasaga ile aiga na mu lo latou faletaavale. Ina ua tatalo le faipule ile nuu, ua oo atu le mataupu i leoleo ae taatia ai faapea.
Ma ua folafola mai ai nei e sui ole afioaga o FAleula, e fua lava se isi faaiuga a le nuu, ile taunuuga ole mataupu a leoleo lea ua taatia atu iai.
Ae ua faia foi le galuega a le nuu, e fesoasoani i leoleo e saili poo ai na susuina le fale taavale ole aiga , poo tauaiga lava o le alii faipule ole itumalo o Sagaga 1.
