E silia ma le 200 atunuu o le lalolagi e aofia ai ma Samoa na auai i le fonotaga lona 68 a le Komisi o malo aufaatasi i New York i Amerika mo le iloiloina o soifuaga o tamaitai o le lalolagi.
I le molimau a le Minisita o le Matagaluega o Tina ma tamaitai atinae nuu ma agafesootai, le afioga ia Mulipola Anarosa Ale Molioo i lona auai atu ai i lenei fonotaga, o se avanoa taua tele mo le faailo ma faailoa nisi o vaega e patino lava i lea atunuu.
Peitai i lana faafofoga i folasaga a nisi o atunuu e ootia ai lava le loto i le tulaga ma le vaaaiga o loo tuu ai e la atunuu le pito laau a tina ma tuumaualalo ai.
Ae faafetai lona loto ia Samoa ona o le faaeaea o loo maualuga ai pea le tulaga ma le siosiomaga o tina ma tamaitai Samoa, pe a amata mai i aiga, o faiga nuu, o Ekalesia seia oo mai lava i le Palemene.
“E taua ia o lenei fonotaga, e faailoa ai le aia tutusa o tagata uma, ae faailoa ai foi ma faamaualuga ai tomai ma agavaa o tamaitai, ma e faafetai ai le loto i le soifuaga o loo ola ma soifua ai tina ma tamaitai i Samoa pea faatusa atu i isi atunuu,” Mulipola Anarosa Ale Molioo.
O le aia tutusa o tagata uma i tulaga maualuluga ma soo se tofiga i totonu o Samoa o le mitamitaga lea oloo i le Minisita o tina ma tamaitai, o faalupega ma matafaioi o tina ua aeae ma siitai ai lo latou foi itupa.
