O loo faaauau lava le alualu i luga o le faitau o tagata Samoa, i Ausetalia, ua aafia i soligatulafono.
E aofia ai tupulaga talavou, ole va o ulugalii talavou ma matua, ae o matua. pei ona faamaonia ma molimauina mai ele tatou paaga i totonu o galuega faalelotoifale a le malo o Ausetalia.
Na asia e le tatou paaga i Ausetalia, le Matagaluega o le saogalemu ma le puipuiga o fanau (Australia Child Protection ma Tamaitai), ma faamaonia mai ai le siitia o le numera o mataupu tau sauaga i fanau, tinã ma tamaita’i, ma taa’ina atu ai tupulaga talavou i le nonofo i luga o auala (street kids), tagofia fualaau faasaina, pauta, (drugs & alcohol) ma ava malosi, ao tina ma fanau iti ua ave i nofoaga o faalavelave faafuase’i le tumau (temporary emergency housing), e tau faaofiofi ai ma nisi foi aiga ua aafia i nei sauaga.
Ma molimauina mai ai e fai si maualuga tele o le aofai o aiga Samoa, o loo vaaia e lea matagaluega, ma ave esea a latou fanau ua faamaonia le aafia i sauaga.
O ta’ua mai e le tatou paaga i totonu, o faanoanoaga, ona o aafiaga o tatou tagata na soifua ane i aoaoga faakerisiano.
Na faatalanoa e le tatou paaga se tasi o faafeagiga, ae lei manao e faailoa lona suafa, e tusa ai ma popolega o loo alia’e ane i aiga i totonu o Ekalesia Samoa, na faailoa manino ai e le Faifeau, e moni tulaga tau mafatiaga o loo feagai pea ma tinã ma fanau, ona o sauaga.
Ua fautuaina e le matagaluega o le saogalemu ma le puipuiga o fanau (Australia Child Protection le toe faamalosia o mafutaga fefaasoaa’i i totonu o aiga, atonu e fesoasoani ile toe tapu’eina o tu ma agaifanua filemu, saogalemu, ma le alofa i totonu o aiga Samoa i Ausetalia.
