E lua isi mataupu poo tagi o le tau faalumaluma ma le tau faaleaga, ua taatia ai nei ile Matagaluega o leoleo ma Falepuipui i Apia.
Ile tali mai a le afioga i le Komesina o le Matagaluega , Auapaau Logoitino Filipo: ina ua tatou fesiligia ile aso, na ia saunoa: “O loo faia ai nei su’esu’ega a leoleo i mataupu o taua i luga. E aofia ai le tagi a le afioga a Olo Afoa Fiti Vaai faasaga ile taitai o le Itu Agai, Tuilaepa Sailele Malielegaoi.
“Ma lesi foi tagi lea na faaulu atu a le Failautusi Aoao a le Vaega faaupufai a le FAST, Vaaoao Alofipo, faasaga ise tamaitai Samoa e nofo i Amerika, ae o lea na malalaga mai ile masina talu ai o Aukuso.”
Na saunoa foi le afioga i le Komesina, ina ua tatou fesiligia, ole mataupu lea ua mae’a atu na faia ai a latou moliaga faasaga ia Tiumalumatua Maifea Fetu, ua ose laasaga lena i luma mo a latou tapenaga, aua isi mataupu o mulimuli mai.
Na ia ta’ua o le mafuaaga na le avea uma ai ile Faamasinoga isi video clips e 20 na avatu e le itu tagi, ona sa fua lava le kilipi na ave ile faamasinoga, i le faamatalaga ale na tagi
Ae o loo taga’i ai nei le Matagaluega o leoleo, ile faaiuga a le Faamasinoga, poo iai se vaega o lea faaiuga e ono faaui atu ai se Apili, ona latou toe apilia ai lea o lena faaiuga.
Ae o le mataupu lea i le tagi ale afioga i le Minisita ia Olo faasaga i le taitai o le HRPP, Tuilaepa, e tatau ona faasee atu le mataupu lena i le Ofisa o le loia Sili talu o loo aafia ai le Minisita o le Kapeneta.
