E oo ane ile taimi o le fono, sa na’o sui o fautasi, ae leai se kulula, ma se paopao, e ui ina sa valaaulia uma lava mole tuuga vaa.
“Ua tapena e toe tilotilo iai, ae ua talosaga ai kapeteni o fautasi e faaauau pea, ae sei tuu atu i le fono a le komiti.” ile saunoaga a le Komesina o Leoleo, Auapaau Logoitino Filipo. Ma ua iai le faamoemoe ole faaumaga o le 60 ole tutoatasi ia Me, ae le’i maua se aso, e mautu mai ile fono a le komiti autu pe afai e talia.
Saunoa Auapaau, “Ua le faia ia Mati, ae tuu ia Me, ia faamanaia ai le faaumaga o le 60 tausaga ia matagofie le faaumaga o le tausaga. O le matou fautuaga lena i le komiti autu, e le’o taofia i le taimi nei vaa e fia auai mai ile tuuga fautasi, ae sei ave pea le iugafono i le komiti autu, pe talia pe faaaua pe leai.”
Molimauina e le Radio Polynesia e silia i le fa fautasi o loo taooto ai Mulinuu, e le’o iai ni foliga e saogalemu pe gafatia ona toe fufui ile sami.
Ua faitau tausaga o faalala ma faatatafa, vagana ai nai isi sa o loo taooto mai lava i totonu o faapaologa, ae ua faitau tausaga foi o ufi. Ma oo mai ai i le taimi nei, e na’o le tolu fautasi o loo lesitala i le tuuga vaa ole 60 tausaga o le tutoatasi o Samoa.
