Na fau ma soloi meaai aano eseese ae o le felanulanuai mai foi o fua o faatoaga o le itumalo o Vaimauga 3 i le latou talomua sa faatino i le faaiuga o le vaiaso.
O talomua o se tasi lea o faamaite a le malo ina ia unaia ai pea ma faaosofia ai pea le mamalu o le atunuu ina ia galueina o latou fanua, ina ia mau meaai ma aua nei oge ise aso e tasi.
Peitai i le pepa o faamatalaga sa faalauaitele mai ai le toatele o tagata na o latou molimauina le faamoemoe a le itumalo lea sa faatino i le afioaga o Vailima le nofoaga oloo faatu ai lo latou fono faavae.
O le afioga i le Minisita Lagolago le afioga ia Maiava Fuimaono Tito Asafo sa fai ma fofoga taumomoli o le Minisita, ma le Matagaluega o Faatoaga ma faigafaiva e momoli le faafetai i le itumalo, mo le lagolago i le faamoemoe o le malo.
O loo faaauau pea ona faatino talomua i itumalo ma fonofaavae e lei faatinoina muamua lea foi faamaite lelei, aua lava le taumafai e faaitiitia o le faamoemoe o le atunuu i meaai mai fafo ma meaai tuu aisa.
