I tala lata ma o le au a Samoa i taaloga a Malo o le Taupulega i Burmingham i Peretania, 2022, ua faitau ai i Samoa i ana pine e lua, tasi le auro ma le siliva.
Ma le vaega siimamafa , na sii muamua ai Vaipapa Nevo Ioane i le vaega o alii 67kg, ma ia maua ai le Pine siliva.
Ua faatuina ai foi e Ioane lesi lekoki ile Jerk, e 166kg. O le sii lona lua a Samoa, e le fou i le taaloga, Don Opeloga, ile vaega o le 96kg, ma ia maua le Pine Auro muamua mo Samoa.
E tolu lekoki ua faatuina e Don OPeloga i taaloga a Malo o le Taupulega. Jack Opeloge, John Lautafi Tafi, Petelo Lautusi ma le tamaitai e tasi, ia Feagaiga Stowers e lei sii i le taimi o tatou lipoti, o loo fai ma sui o Samoa i taaloga ole sii mamafa.
O isi taaloga pei o le au feausi, ile aso lona lua, o taaloga, na feausi ai Lushavel Strickland ile 50 mita freestyle m ale 100 mita backstroke.
Na ta’ua ole faiga lava lea o ia foi ituaiga o taaloga, ile sosoo lava i le aso e tasi. Sa ia iloa lava le faigata, ae sa mana’o lava e feausi i tauvaga ia e lua. O lana taimi faamauina 30.46 ile 50 mita backstroke.
Aso lona tolu, na oo ai Olivia Borg ile semi final, ile feausiga a tamaitai 50 mita Butterfly. O lana taimi faamauina e 27.37, ma e lona 15 ai ile faasologa o lea vaega i taaloga a malo o le taupulega.
Ae ua ia maua ai foi le lekoki i Samoa. Ma o ia foi le tamaitai feausi muamua mai Samoa ua oo i le Semifinal. O Kokoro Frost na feausi ile 50 mita back stroke.
Brandon Schuster na feausi i le 100m freestyle, na ia ta’ua e tofu lava le taimi ma ona ia foi lu’itau, pei foi ona iai lenei tauvaga.
Ae ole oo lava iai ma feausi i le mea a gata ai, e aoga mo le agai i luma. O tauvaga nei e faatonutonu ai, ma e mana’omia ai lava ona faaauau pea le faia o tuuga, faatonu folau mo isi tauvaga.
