Ua silia i le $700tala le tau o le pasese malaga o le alu ma le toe foi mai Amerika Samoa. O le pasese lena a le Samoa Airways, o loo iai i le vaiaso lenei ma le vaiaso fou.
Peita’i e le na’o le alu i Amerika Samoa lea ua maoa’e le siita’i o le tau o pasese o Vaalele.
Ua le tasi pe lua afe tala le alu i Niusila latou ma Ausetalia. Ae o le mafuaaga lava lea ua tuuina mai e Pulega o kamupani vaalele, o le taugata ole Suauu, ma o loo molimauina foi ile tau oloa o loo faatau mai fafo.
Ae o le taugata ai o le Pasese i Amerika Samoa i le tali mai a le Susuga a Fauoo Tielu o le pule o le Samoa Airways, ina ua tatou fesiligia, Atonu ai e tau feololo mai le tau o pasese pe ‘a toe tatala le malae vaalele i Fagalii. O le’a taugofie ai le suauu mo vaalele.
O pasese sa iai i Fagalii i Tafuna, sa lata i le 400tala, peita’i ua toe faaopopo lesi 300 ma ona tupu ina ua tapunia ai Fagalii, mo Faleolo i Tafuna.
O le tau lata mai i le landing fee i Amerika Samoa talu mai le masina o Iulai, mo vaalele tulaueleele atu i Samoa, sa iai lea i le na’o le $1005.00 tala Amerika i le masina, pei ona lipotia mai e le tatou sui i Amerika Samoa.
Ae mo le taimi nei, ile pulega a le Samoa airways i Matafele, ua mana’omia ona faaaoga le aufaigaluega, e fetaui ma le auaunaga o loo faatino, i Vaa laiti, mo le tuuitiitia o tupe faaalu. O avanoa pule sa faasalalau talu ai nei, pei ona ta’ua e le afioga Fauoo.
“E omai e manage le kamupani lea e iai ile taimi lenei.
O isi tagata na hire i lalo ole kamupani o iai le Vaalele tele, e mana’omia ona faamatuu ese tagata ona e tetele tele o latou totogi, ae aumai tagata e fetaui ma le kamupani ua iai nei, na’o vaalele laiti.
O le aufaigaluega a le Samoa Airways e tusa o le 140, e aofia ia male tele o galulue ile malaevaalele i Faleolo.
